ԵՐԵՎԱՆ, 29 մայիսի — Sputnik. Հայաստանի Ջերմուկ առողջարանային քաղաքը 2017 թվականի ԱՊՀ երկրների լավագույն առողջարանային քաղաքների ցանկում է ընդգրկվել, հայտնում է ՏուրՍտատ գործակալությունը։
Գործակալությունը սահմանել է 2017 թվականին ԱՊՀ երկրների և Վրաստանի ամենամեծ տարածում ստացած ջերմուկաբուժական և առողջարանային քաղաքները։ ԱՊՀ երկրների և Վրաստանի ջերմուկաբուժարանների հնգյակում ընդգրկվել են` Հայաստանը, Աջարիան, Ադրբեջանը, Բելառուսն ու Ղազախստանը։
Դրանց շարքում են` Ջերմուկը (Հայաստան), Նարոչը (Բելառուս), Նավթալանը (Ադրբեջան), Սարիագաշը (Ղազախստան), Քոբուլեթի (Աջարիա)։
Վարկանիշային ցուցակը կազմվել է հյուրանոցների օնլայն ամրագրման համակարգերի տվյալների բազայի հիման վրա։
ՏուրՍտատի տվյալների համաձայն` ԱՊՀ տարածքի առողջարաններն ամրագրում են միջինը 14 օրվա համար, մեկ հոգու համար միջին արժեքը կազմում է 42 ԱՄՆ դոլար` ներառյալ հյուրանոցը, սնունդն ու կազդուրիչ պրոցեդուրաները։
Հայաստանի Վայոց ձորի մարզում գտնվող Ջերմուկն արտասահմանյան զբոսաշրջիկների շրջանում ամենապահանջված վայրերից է։ Քաղաքը ճանաչում է ստացել հանքային ջրի աղբյուրի և հիասքանչ բնության շնորհիվ։
