Sputnik Արմենիայի թղթակիցները եղել են Վայոց Ձորի մարզում, որտեղ էլ հենց գտնվում է բուժիչ հանքային ջրերով հարուստ քաղաքը։ Ջերմուկի շուրջ 70 մետր բարձրություն ունեցող ջրվեժը գրանցված է Հայաստանի Հանրապետության Բնապահպանության նախարարության բնության պետական հուշարձանների ցանկում, և ժողովուրդն այն անվանել է «Ջրահարսի վարսեր»։ Այս վայրում զբոսաշրջիկների պակաս երբեք չի լինում։ Աշխարհի տարբեր անկյուններում շրջած օտարերկրացիները չեն թաքցնում, որ Ջերմուկի ջրվեժն իսկական հրաշք է։
«Ջրահարսի վարսերի» մասին մի հին լեգենդ կա։ Ասում են` հնում ջրվեժի տեղում, անդնդախոր ժայռերի ծերպին իշխանի ամրոց է եղել, իշխանը գեղեցկուհի դուստր է ունեցել։ Իշխանուհու ձեռքը խնդրելու են եկել աշխարհի տարբեր ծայրերից, սակայն նա մերժել է բոլորին, քանզի սիրել է հովվի երիտասարդ, քաջարի ու գեղեցիկ որդուն։ Ամեն օր կեսգիշերից հետո ամրոցի իր ննջարանի լուսամուտից դեռատի իշխանուհին ձորն է նետել երկար պարանի ծայրը, որով հովվի որդին խոր կիրճից բարձրացել է սիրեցյալի մոտ։
Իշխանը շուտով իմացել է այդ մասին, փրփրել ու անիծել դստերը. եթե մեկ էլ հանդիպի հովվի որդուն, թող ջրահարս դառնա ու ջրից երբեք դուրս չգա։ Սակայն դեռատի սիրահարները շարունակել են հանդիպել, և հերթական անգամ, որպեսզի սիրեցյալին օգնի բարձրանալ իր դղյակը, գեղեցկուհին պարանի փոխարեն ժայռի բարձունքից կախել է իր երկար ու գեղեցիկ վարսերը։ Սակայն նույն ակնթարթին կատարվել է հոր դաժան անեծքը. գեղեցկուհին դարձել է ջրահարս, իսկ կիրճ թափվող նրա գեղեցիկ վարսերը վերածվել են հրաշագեղ մի ջրվեժի, որին ժողովուրդը անվանում է «Ջրահարսի վարսեր»:
