ԵՐԵՎԱՆ, 24 մայիսի — Sputnik. Գերմանիայում կայանալիք վարկանիշային մրցաշարը վերջին հնարավորություն է ձմեռային օլիմպիական խաղեր ուղեգիր նվաճելու համար: Այս մասին ՀԱՕԿ-ի լրատվականին ասել է հայազգի գեղասահորդուհի Անաստասիա Գալուստյանը։
«Ճանապարհս դեպի օլիմպիական խաղեր երկար էր և պետք է այնտեղ հանդես գամ: Գերմանիայում անհրաժեշտ է տեղ զբաղեցնել լավագույն վեցյակում: Այդ մրցաշարին կավելանան գեղասահորդներ այն երկրներից, որոնք աշխարհի առաջնությանը չեն մասնակցել»,-ասել է նա:
Գեղասահորդուհին նշել է, որ միշտ ուրախությամբ է Հայաստան այցելում: «Կցանկանայի ավելի հաճախ դա անել, բայց առայժմ չկա նման հնարավորություն: Ապրում ու մարզվում եմ Մոսկվայում, մինչդեռ այստեղ ես հայրական կողմի բարեկամներ ունեմ։ Երեւանի սահադաշտն ինձ շատ է դուր գալիս, այստեղ բոլոր պայմանները կան: Մարզվում եմ Ծաղկաձորի մարզաբազայում: Ցանկանում ենք ամռանը հավաք կազմակերպել Երեւանում»,- ասել է գեղասահքի Հայաստանի չեմպիոն Անաստասիա Գալուստյանը:
Նա նշել է, որ աշխարհի առաջնությունում լավ հանդես գալուն իրեն խանգարել է ուժեղ հոգեբանական լարվածությունը: «Շատ էի ցանկանում օլիմպիական ուղեգիր նվաճել ու արդարացնել իմ եւ ուրիշների հույսերը: Կարծում եմ, որ իմ գնահատականները մի փոքր իջեցված էին: Արդյունքում ինձ ընդամենը մեկ տեղ չբավականացրեց»:
Գալուստյանն ասել է, որ պատրաստվում է Հայաստանում մի փոքր կհանգստանալ, հետո հավաք են նախատեսում Ռուսաստանում: Ամենայն հավանականությամբ աշնան սկզբին Իտալիայում նա կմասնակցի միջազգային մրցաշարին, որը Գերմանիայի վարկանիշային մրցաշարից առաջ նրա գլխավոր փորձը կլինի:
