ԵՐԵՎԱՆ, 5 ապրիլի — Sputnik. Հայաստանի գեղասահքի ֆեդերացիայի նախագահ Մելանյա Ստեփանյանը կարծում է, որ հայ գեղասահորդուհի Անաստասիա Գալուստյանը Հելսինկիում կայացած գեղասահքի աշխարհի առաջնությանն իր հնարավորություններն ամբողջությամբ ցույց չտվեց:
«Նա շատ էր ճնշված պատասխանատվության զգացումից, քանզի աշխարհի առաջնությունը 2018 թվականի ձմեռային օլիմպիական խաղերի ընտրական մրցաշար էր: Ես մշտապես հիշեցնում էի նրան, որ սա միայն առաջին հնարավորությունն է: Կա նաև սեպտեմբերին Գերմանիայում կայանալիք ընտրական մրցաշար: Անաստասիան շատ լարված էր ու մենք, չնայած բոլոր ջանքերին, չկարողացանք հանդարտեցնել նրան… Օլիմպիական կրքերը նրան «կերան»»,- Ստեփանյանի խոսքերն է մեջբերում Հայաստանի ազգային օլիմպիական կոմիտեի մամուլի ծառայությունը։
Նա նշել է, որ գեղասահորդուհին չկարողացավ ներկայանալ նույն ոգևորությամբ, ինչպես Օստրավայի Եվրոպայի առաջնությունում, թեև մոտ էր Օլիմպիական խաղերին մասնակցելուն։
«Ի սկզբանե Փխենյան 2018-ին մասնակցելու համար պետք է ընտրվեր լավագույն 20-ը, բայց ընտրական համակարգը մեր մարզաձևում բավականին բարդ է: Այստեղ նշանակություն ունի առանձին վերցված երկրի համար սահմանված ուղեգրերի քանակը: Բոլոր հաշվարկներից հետո պարզվեց, որ 2018 թվականի խաղերին մասնակցելու է 22 գեղասահորդուհի, իսկ Նաստյան 23-րդն էր: Դրանից աղջիկն ավելի ընկճվեց, բայց կյանքը շարունակվում է»,- ասում է Հայաստանի գեղասահքի ֆեդերացիայի նախագահը։
Ստեփանյանը մեկնաբանեց նաև Սլավիկ Հայրապետյանի ելույթը։ Նա նշեց, որ տղամարդկանց գեղասահքում ուժեղ մրցակցություն է, գրեթե բոլորը կատարում են քառակի ցատկեր: Ինչ վերաբերում է Թինա Կարապետյան/Սիմոն Պրու-Սենեկալ պարային զույգին, նրանք շատ լավ կատարեցին ծրագիրը: Ստեփանյանը նրանց խորհուրդ է տվել մինչև ընտրական մրցաշարը փոխել մարզչին:
«Նրանք մարզվում են Կանադայում, որտեղ պարային զույգերի շատ ուժեղ դպրոց կա: Ես խորհուրդ եմ տվել մինչեւ ընտրական մրցաշարը փոխել մարզչին: Թինային եւ Սիմոնին նոր սկիզբ է հարկավոր, իսկ Կանադայում որակյալ մասնագետների մեծ ընտրություն կա: Շոն Ուինթերը լավ մարզիչ է, բայց եկել է փոփոխությունների ժամանակը: Մեր պարային զույգն օլիմպիական խաղերին մասնակցելու հնարավորություն ունի»,- ասել է նա։
Օգոստոսից մարզիկները նորից կշարունակեն մասնակցել միջազգային մրցաշարերի: Այս մրցաշրջանում նրանց միայն մեկ մեկնարկ է մնացել` Հայաստանի առաջնությունը, որը կանցկացվի մայիսին:
