ԵՐԵՎԱՆ, 23 մայիսի — Sputnik. Հայաստանը մի քանի տարվա ընթացքում կարող է 50 մլն դոլար ծախսել` Ռոստսելմաշից գյուղատնտեսական տեխնիկա ձեռք բերելու համար, ասաց ՌԴ-ում Հայաստանի դեսպան Վարդան Տողանյանը` Ռոստովի շրջանի մարզպետ Վասիլի Գոլուբևի հետ հանդիպման ժամանակ, հայտնում է ռուսական ձեռնարկության մամուլի ծառայությունը։
Անցած շաբաթ տեղի ունեցավ Ռոստովի շրջանի մարզպետ Վասիլի Գոլուբևի և Վարդան Տողանյանի հանդիպումը տարածաշրջանային կառավարությունում։ Հանդիպումը նվիրված էր Հայաստանի և Ռոստովի շրջանի միջև համագործակցության զարգացման հեռանկարների հարցերի քննարկմանը։
Տողանյանը նշեց, որ Հայաստանը ցանկանում է թարմացնել գյուղատնտեսական տեխնիկայի պարկը Ռոստսելմաշ ընկերության արտադրանքի հաշվին։
«Մենք ցանկանում ենք Ռոստովի շրջանի հետ հարաբերությունները նոր մակարդակի հանել, ելնելով այն իրողություններից, որոնք կան։ Կցանկանայինք ամրապնդել մեր բիզնեսը, առևտրային տուն ու առևտրային ներկայացուցչություններ բացել։ Համապատասխանաբար զարգացնել միջկառավարական խոշոր նախագծերը` ամբողջ երկրի համար գյուղատնտեսական տեխնիկայի ձեռքբերման հարցում համագործակցությունը, որի համար Հայաստանում պետական ծրագրեր կան», — ասաց Տողանյանը։
Նրա խոսքով` Ռոստսելմաշն առավել ապահով գործընկեր է, որի հետ հայկական կողմը ցանկանում էր համակարգային հարաբերություններ կառուցել։ Օգտվելով երկրի աշխարհագրական դիրքից` նրա կարծիքով, ընկերությունը կարող է դուրս գալ Իրանի և Մերձավոր Արևելքի երկրների շուկաներ։
Դեսպանն ավելացրեց նաև, որ թարմացման ենթակա է գյուղատնտեսական տեխնիկայի պարկի շուրջ 95%-ը։
«Կարծում եմ, շուրջ 50 մլն դոլար է հարկավոր մի քանի տարիների ընթացքում, 5 մլն դոլարի տեխնիկա այս տարի արդեն նախատեսված է ձեռք բերել», — ընդգծեց Տողանյանը։
«Ռոստսելմաշն» ընկերությունների խումբ է, որի կազմում ընդգրկված է Rostselmash, Versatile, Farm King, Buhler ապրանքանիշերի տեխնիկա արտադրող 13 ձեռնարկություն։ Ռուսաստանի, ԱՄՆ-ի և ԵՄ-ի համար ագրոբիզնեսի մեքենաների և սարքավորումների ամբողջական շարք են արտադրում։ Ընկերության արտադրանքը ներառում է տեխնիկայի 24 տեսակի ավելի քան 150 մոդել և մոդիֆիկացիա։
