ԵՐԵՎԱՆ, 22 մայիսի – Sputnik. Ռուսաստանը 2017 թվականին կշարունակի ռազմամթերք մատակարարել Հայաստանին, Բելառուսին և Ղազախստանին։ Այս մասին Մինսկում ասել է Ռուսաստանի ռազմատեխնիկական համագործակցության դաշնային ծառայության տնօրեն Դմիտրի Շուգաևը։
«Ռուսաստանը 2017 թվականին կշարունակի ռազմամթերք մատակարարել նշված պայմանագրերի համապատասխան (Բելառուսի, Հայաստանի և Ղազախստանի հետ պաշտպանության ոլորտում համագործակցության մասին համաձայնագրեր)։ Խոսքը վերաբերում է, առաջին հերթին, ավիացիոն տեխնիկային, մասնավորապես` ուղղաթիռներ, ՀՕՊ համակարգեր և զրահատրասպորտային միջոցներ», — ասել է Շուգաևը։
ՀԱՊԿ գլխավոր քարտուղարի տեղակալ Վալերի Սեմերիկովն ասել է, որ ՀԱՊԿ արագ արձագանքման հավաքական ուժերի ազգային միավորումներին անհատույց հիմունքներով սպառազինություն մատակարարելու վերաբերյալ ծրագրի իրականացումը կարող է վերսկսվել մոտակա տարիներին։
Նա նշել է, որ մատակարարվող տեխնիկայի դիմաց վճարն իրականացվում է արտոնյալ հիմունքներով` արտադրող երկրի գներով (կազմակերպության գործընկերոջը մատակարարումն իրականացվում է ներպետական գներով)։
«Մշակվել է ծրագիր, թե տեխնիկայի և ռազմական նշանակության արտադրանքի ինչ տեսակներ և երբ պետք է մատակարարվեն կոնկրետ պետությանը, գրեթե համաձայնեցվել է բոլոր պետությունների հետ և պետք է ուժի մեջ մտներ 2015-2016 թվականներին։ Սակայն ճգնաժամի, պատժամիջոցների հետ կապված որոշում էր ընդունվել, որ այդ բարդություններով պայմանավորված` ծրագրի իրականացումը կկասեցվի, սակայն միայն անհատույց մատակարարման մասով», — ասել է Սեմերիկովը։
Գլխավոր քարտուղարն ավելացրել է, որ ծրագրի իրականացումն ամբողջովին կվերականգնվի հավանաբար 2018-2019 թվականներին։ Ավելի վաղ Երևանը հայ-ռուսական պայմանագրի շրջանակում 200 մլն դոլարի վարկ էր ստացել զենք գնելու համար։ 2015 թվականին ստորագրված համաձայնագրով նախատեսվում էր ռուսական արտադրության ռազմամթերք գնել։ Համաձայնագիրը ստորագրվել է դեռևս 2015 թվականի հունիսի 25-ին, սակայն ուժի մեջ է մտել միայն 2016 թվականի փետրվարի 10-ին։
