ԵՐԵՎԱՆ, 22 մայիսի — Sputnik. Քրեական գործի նախաքննությունը փաստաբան Գուրգեն Հարությունյանին թույլ չի տալիս շատ մանրամասներ հաղորդել, բայց նա մի քանի բառով ներկայացրեց իր պաշտպանյալի` ռուս զինծառայող Դմիտրի Յալպաևի սպանության մեջ մեղադրվող Արման Ջանջուղազյանի առողջական խնդիրը և հանրային պաշտպանից հրաժարվելու պատճառը։
«Առերևույթ հոգեկան խնդիրներ կան, բայց ավելին ասել չեմ կարող»,- նշեց Հարությունյանը։
Ջանջուղազյանը հրաժարվել է հանրային պաշտպան Սյուզան Խչեյանի պաշտպանությունից։
Sputnik Արմենիայի հետ զրույցում փաստաբան Հարությունյանը շեշտեց` հանրային պաշտպանն ուզեր-չուզեր, պետք է չմասնակցեր այդ գործին, քանի որ հարազատներն իրեն են հրավիրել որպես փաստաբան։
Տեղեկացնենք, որ զինծառայող Դմիտրի Յալպաևը սպանվել է ապրիլի 22-ին։
Դեպքից որոշ ժամանակ անց սպանությունը կատարելու կասկածանքով ձերբակալվել էր Արման Ջանջուղազյանը: Նրան մեղադրանք է առաջադրվել՝ ՀՀ Քրեական օրենսգրքի սպանության հոդվածի հատկանիշներով:
Ավելի ուշ քննչական կոմիտեն հայտարարել էր, որ նա հոգեկան հիվանդությամբ է տառապում: Հայտնի է նաև, որ Ջանջուղազյանն անցյալ տարի նոյեմբերին զինծառայության մեջ լինելով, ածելիով ինքնավնասում է կատարել՝ ձախ նախաբազկի շրջանում: Տեղի ունեցածի հետևանքով նրան հոսպիտալացրել են, որից հետո ինքնավնասում է կատարել հիվանդասենյակի զուգարանում: Մասնագիտական հետազոտման ենթարկելու համար Ջանջուղազյանին տեղափոխել են ՀՀ ՊՆ Երևանի կայազորային հոսպիտալի հոգեբուժական բաժանմունք: Նրա նկատմամբ նշանակվել է ռազմաբժշկական և դատահոգեբուժական ամբուլատոր համալիր փորձաքննություն:
Կատարված փորձաքննության եզրակացության համաձայն՝ Արման Ջանջուղազյանի մոտ հայտնաբերվել են հոգեկան խանգարումներ, ինչի հետևանքով Ջանջուղազյանը զինվորական ծառայության համար ճանաչվել է ոչ պիտանի և այդ հիմքով այս տարի մարտի 9-ին զորացրվել է:
Ի դեպ, Ջանջուղազյանն արդեն իսկ մեկ այլ քրեական գործով ունի մեղադրյալի կարգավիճակ: Նա մեղադրվում է զորամասում ոչ կանոնադրային հարաբերությունների և քնած ծառայակցին աթոռով հարվածելու համար: Ջանջուղազյանի անձի հետ կապված այլ լուրերը, մասնավորապես, որ վերջինը Հայաստան է տեղափոխվել Հունաստանից, բնակվել է Ստեփանավանում, դեպքի օրը եկել է Գյումրի և որ մահմեդականություն է դավանում, պաշտոնական աղբյուրները դեռ չեն մեկնաբանել։
Հայաստանի պաշտպանության նախարար Վիգեն Սարգսյանը հավաստիացրել է իր ռուս գործընկեր Սերգեյ Շոյգուին, որ ՀՀ կառավարությունը քայլեր կձեռնարկի սպանության հանգամանքները պարզելու և մեղավորին պատժելու համար։
