ԵՐԵՎԱՆ, 26 ապրիլի — Sputnik. Գյումրու 102-րդ ռուսական ռազմակայանի զինծառայող 21-ամյա Դմիտրի Յալպաևի հրաժեշտի արարողությունը տեղի կունենա Մարի Էլ հանրապետության Նովոտորյալս շրջանում, գրում է «Վերսիա» պարբերականը։ Յալպաևին, զինվորական կարգի համաձայն, կթաղեն Մարի Էլ հանրապետության Նովոտորյալս շրջանում։ Նա մեծացել է գիշերօթիկ հաստատությունում, այնուհետև նրան որդեգրել է Վոլժսկից մի ընտանիք։ Ունի եղբայր և քույր։
Հիշեցնենք, ապրիլի 22-ին, ժամը 17:15-ի սահմաններում Գյումրիում դանակահարության հետևանքով մահացել էր 102-րդ ռուսական ռազմակայանի զինծառայող 21-ամյա Դմիտրի Յալպաևը:
Դեպքից որոշ ժամանակ անց սպանությունը կատարելու կասկածանքով ձերբակալվել էր Արման Ջանջուղազյանը: Նրան մեղադրանք է առաջադրվել՝ ՀՀ Քրեական օրենսգրքի սպանության հոդվածի հատկանիշներով: Ջանջուղազյանի նկատմամբ կալանքը որպես խափանման միջոց կիրառելու վերաբերյալ նախաքննական մարմնի միջնորդությունը դատարանը բավարարել է:
Ավելի ուշ քննչական կոմիտեն հայտարարել էր, որ նա հոգեկան հիվանդությամբ է տառապում: Հայտնի է նաև, որ Ջանջուղազյանն անցյալ տարի նոյեմբերին զինծառայության մեջ լինելով, ածելիով ինքնավնասում է կատարել՝ ձախ նախաբազկի շրջանում: Տեղի ունեցածի հետևանքով նրան հոսպիտալացրել են, որից հետո ինքնավնասում է կատարել հիվանդասենյակի զուգարանում: Մասնագիտական հետազոտման ենթարկելու համար Ջանջուղազյանին տեղափոխել են ՀՀ ՊՆ Երևանի կայազորային հոսպիտալի հոգեբուժական բաժանմունք: Նրա նկատմամբ նշանակվել է ռազմաբժշկական և դատահոգեբուժական ամբուլատոր համալիր փորձաքննություն:
Կատարված փորձաքննության եզրակացության համաձայն՝ Արման Ջանջուղազյանի մոտ հայտնաբերվել են հոգեկան խանգարումներ, ինչի հետևանքով Ջանջուղազյանը զինվորական ծառայության համար ճանաչվել է ոչ պիտանի և այդ հիմքով այս տարի մարտի 9-ին զորացրվել է:
Ի դեպ, Ջանջուղազյանն արդեն իսկ մեկ այլ քրեական գործով ունի մեղադրյալի կարգավիճակ: Նա մեղադրվում է զորամասում ոչ կանոնադրային հարաբերությունների և քնած ծառայակցին աթոռով հարվածելու համար: Ջանջուղազյանի անձի հետ կապված այլ լուրերը, մասնավորապես, որ վերջինը Հայաստան է տեղափոխվել Հունաստանից, բնակվել է Ստեփանավանում, դեպքի օրը եկել է Գյումրի և որ մահմեդականություն է դավանում, Սոնա Տռուզյանը չմեկնաբանեց՝ նշելով, որ «նախաքննական մարմինն ուսումնասիրում է բոլոր վարկածները»:
Հայաստանի պաշտպանության նախարար Վիգեն Սարգսյանը հավաստիացրել է իր ռուս գործընկեր Սերգեյ Շոյգուին, որ ՀՀ կառավարությունը քայլեր կձեռնարկի սպանության հանգամանքները պարզելու և մեղավորին պատժելու համար։
