ԵՐԵՎԱՆ, 22 մայիսի – Sputnik. ՀՀ ԱԺ նախագահ Արա Բաբլոյանը ծննդյան օրվա առթիվ շնորհավորական ուղերձ է հղել Շվեյցարիայի Համադաշնությունում ՀՀ արտակարգ և լիազոր դեսպան, ՀՀ ազգային հերոս Շառլ Ազնավուրին: ԱԺ նախագահի ուղերձում մասնավորապես ասվում է.
«Ժամանակի ու սերունդների միջով քայլող Ձեր արվեստը միավորում է տարբեր մշակույթներ, երկրներ ու ժողովուրդների: Այն ազգային ու համամարդկային է, երգարվեստի հանրահայտ ուղղություններից մեկին պատկանելով` միաժամանակ առանձնահատուկ` ազնավուրյան:
Նույնքան ինքնատիպ են Ձեր ձայնն ու կատարողական արվեստը, և այդ ամենի շնորհիվ Ձեր կատարմամբ հնչող երգերը երջանիկ ճակատագիր ունեն` երկար տարիներ վայելելով հանդիսատեսի սերն ու համակրանքը: Այսօր էլ իմ մեջ պահելով Ձեր երգերից ստացած անջնջելի տպավորություններս` ջերմությամբ եմ հիշում նաև Ձեզ հետ ունեցած հանդիպումներս Հայաստանում և Ֆրանսիայում»:
Ազգային ժողովի նախագահը մաղթել է առողջություն, արևշատություն և ամենայն բարիք:
