ԵՐԵՎԱՆ, 16 մայիսի — Sputnik, Մարիա Շելուդյակովա. Ամենայն Հայոց կաթողիկոս Գարեգին երկրորդը հանդիպեց Ռուսաստանում Հայաստանի դեսպան Վարդան Տողանյանի հետ։ Դեսպանատանը կազմակերպած հանդիպմանը ներկա էին նաև հայ համայնքի բազմաթիվ ներկայացուցիչներ։
Ամենայն հայոց կաթողիկոս Գարեգին Բ-ն Գերագույն հոգևոր խորհրդի անդամների հետ Մոսկվա է ժամանել երկուշաբթի` մայիսի 15-ին։ Նա արդեն մասնակցել է «Տապան» թանգարանում Ռուսաստանում առաջին Հայ առաքելական եկեղեցու թեմի ստեղծման 300-ամյակին նվիրված գեղարվեստական ցուցահանդեսի բացմանը։
Հայաստանի դեսպանատանը կազմակերպած հանդիպման ընթացքում Տողանյանը հիշեցրեց, որ հիշարժան օրը համընկել է հայ-ռուսական դիվանագիտական հարաբերությունների հաստատման 25-ամյակի հետ։
«Հատկանշական է, որ հոգևոր խորհրդի գերագույն նիստը անցնում է Մոսկվայում, մեզ համար կարևորագույն այս տարում», — ընդգծել է դեսպանը։
Տողանյանը նշեց, որ Հայ Առաքելական եկեղեցին արտերկրում` Հայաստանի սահմաններից դուրս, կարևոր մի մարմին է և բոլոր դիվանագետների անունից հայցեց Գարեգին Բ-ի օրհնությունը։
«Դիվանագետներն ու հոգևորականները միասնական են լինելու ժողովրդի համախմբման գործում», — ասաց նա։
Դեսպանը շնորհակալություն հայտնեց կաթողիկոսին` այցելության համար, նշելով, որ դեսպանատան շենքը երկու հարյուր տարուց ավելի եղել է «հայկական մտքի հասարակական մշակութային կենտրոնը», և հույս հայտնեց, որ այդ «շենքում, և հարակից նրբանցքում, որը կրում է հայկական նրբանցք անունը, նորից կվերականգնվի հայերի աշխույժ կյանքը»։
Գարեգին Բ-ն, իր հերթին, վստահություն հայտնեց, որ նման փոխգործակցությունը զգալի արդյունքներ կտա և կհամախմբի Ռուսաստանում բնակվող բոլոր հայերին։
«Առիթ չենք ունեցել նախապես ճանաչելու մեր դեսպանին, պատահական, երկու շաբաթ առաջ մենք նույն օդանավով ճանապարհորդեցինք, և այսօր` մեր 2-րդ հանդիպմանը, Վարդան Տողանյանը մեզ դիմավորեց և ուղեկցեց առաջնորդանիստ եկեղեցի: Այս երկու կարճ հանդիպումների ընթացքում մենք տեսանք հայրենասեր, բարձր պատասխանատվություն և գիտակցություն, նաև ստեղծագործական միտք ունեցող անձնավորության, որի սիրտն ու հոգին տրոփում են ազգային շահերի և ազգային արժեքների համար։
Ինձ ուրախացնում է այն սերտ և ջերմ գործակցությունը, որը ձևավորվել է դեսպանատան և թեմի միջև, այս հարցում էլ կարևոր դերակատարում ունի մեծարգո դեսպանը», — հայտնեց կաթողիկոսը։ Ամենայն հայոց կաթողիկոսը կոչ արեց բոլոր հայերին որքան հնարավոր է մեծ ջանքեր գործադրել Ռուսաստանի հետ ամուր հարաբերությունները զարգացնելու համար։
«Իմ աղթոքն եմ առ աստված բարձրացնում՝ հայցելով, որ տիրոջ օրհնությունը հովանի լինի այս երկրում ապրող ժողովրդի համար, որոնց շարքում և մեր ազգի զավակներն են։ Հայցում եմ, որ տիրոջ օրհնությունը հովանի լինի հայկական բոլոր հաստատությունների վրա, դրանք զորացնի իրենց առաքելության և ծառայության մեջ, հայ կյանքը միշտ վերընթաց պահի, միշտ շենացնի։
Մեր աղթոքն է, որ տերը զորավիգ դարձնի մեր հայրենիքի հայրենաբնակ և սփյուռքում ապրող մեր ժողովրդի զավակներին, որպեսզի միասնաբար կարողանանք կյանքի կոչել և իրականություն դարձնել այն բոլոր բարի ձգտումներն ու տեսիլքները, որ յուրաքանչյուր հայորդի ունի ծրարած իր հոգում` հայրենիքի շեն, պայծառ կյանքի, հայրենիքի զորության համար», — ասաց Գարեգին Բ-ն։
Հանդիպման վերջում Կաթողիկոսը դեսպանին ընծայեց Վարդգես Սուրենյանցի Աստվածամոր պատկերը: Գարեգին Բ-ի այցը Մոսկվա կտևի երեք օր։ Երեքշաբթի կաթողիկոսը կբացի Մոսկվայում Գերագույն հոգևոր խորհրդի արտագնա նիստը, ինչպես նաև կայցելի Կրեմլ և Զինապալատ։
