ԵՐԵՎԱՆ, 15 մայիսի — Sputnik, Մարիա Շելուդյակովա. Ամենայն հայոց կաթողիկոս Գարեգին Բ-ն մասնակցեց «Տապան» թանգարանում ցուցահանդեսի բացման արարողությանը, որը գտնվում է Մոսկվայի Ռուսական և Նոր Նախիջևանի թեմի տաճարային համալիրում։
Հայ հայտնի նկարիչների կտավների ցուցահանդեսը նվիրված է Ռուսաստանում Հայ առաքելական եկեղեցու թեմի ստեղծման 300-ամյակին։ Գարեգին II-ը Գերագույն հոգևոր խորհրդի անդամների հետ առաջին անգամ այցելեց տաճարային համալիր։
Հայկական եկեղեցու եպիսկոպոսներն աղոթեցին երկու աստվածապաշտ ժողովուրդների` Ռուսաստանի և Հայաստանի բարօրության համար։ Երկուշաբթի թանգարանի շենքում, բացի Գերագույն հոգևոր խորհրդի անդամներից, հավաքվել էին հայտնի քաղաքական և մշակութային գործիչներ` Ռուսաստանում Հայաստանի դեսպան Վարդան Տողանյանը, էստրադային արտիստ Եվգենի Պետրոսյանը, ՌԴ «Պաղեստինյան կայսերական ուղղափառ միություն» (ՊԿՈՒՄ) մարդասիրական կազմակերպության նախագահ Սերգեյ Ստեպաշինը և Պատմության պետական թանգարանի տնօրեն Ալեքսեյ Լևիկինը։
«Երախտագիտության խոսքեր ենք հղում առ աստված, որ Ռուսաստանում բնակվող մեր հայրենակիցները Առաքելական եկեղեցու գլխավորությամբ հավատարիմ են մնում հայրերի սուրբ և նվիրական ժառանգությանը,- ասաց Գարեգին II-ը հավաքվածներին։ — Աստվածապահ թեմը հաջողությամբ ընդլայնում է գործողությունների դաշտն ու աջակցում հայկական մշակույթի զարգացմանը»։
Բացման արարողությունից հետո Մոսկվա ժամանած հոգևորականներն ուսումնասիրեցին հայ նկարիչների` նվեր ստացած կտավները։ Խորհրդի անդամների խոսքով` ցուցահանդեսում ներկայացվել են Հայաստանի անցյալից ժառանգություն ստացած սրբազան մասունքները։
Նկարների շարքում ներկայացված են Մարտիրոս Սարյանի «Աշան Մուրադյանի դիմանկարը» և «Նատյուրմորտ» կտավները, Եղիշե Թադևոսյանի «Աղոթքը» և այլ կտավներ։
«Կտավներից յուրաքանչյուրն առանձին պատմություն է մեր ժողովրդի ստեղծագործական ոգու, նրա սուրբ հավատքի և աստվածասիրության, մշակույթին, գիտությանն ու կրթությանը նվիրված լինելու մասին», — նշել է կաթողիկոսը։
«Տապան» թանգարանը, որի նպատակն ազգային ինքնության պահպանումն է, Ռուսաստանում հայերի կյանքի մշակութային գլխավոր օջախ է դարձել։ Հայկական եկեղեցու եպիսկոպոսները երախտագիտություն հայտնեցին համալիրի ղեկավարությանը Հայաստանի մշակույթի պահպանմանն ուղղված ջանքերի համար և բարգավաճում մաղթեցին։
Պատմության պետական թանգարանի տնօրեն Ալեքսեյ Լևիկինն իր հերթին նշեց, որ նույնիսկ պատմաբանները չեն կարող որոշել երկու երկրների միջև քաղաքական սերտ կապերի հաստատման ճշգրիտ ամսաթիվը։ Այդ կապերը հավանաբար բնականոն զարգացում են ապրել ռուսական պետականության ծագման պահից։ Ռուսաստանն ու Հայաստանը ընդհանուր արմատներ ունեն, որոնք նախևառաջ կապված են հավատքի հետ։
Ամենայն հայոց կաթողիկոս Գարեգին Բ-ն Մոսկվա է ժամանել երկուշաբթի` մայիսի 15-ին, և նրա այցը կտևի ևս երեք օր։ Նա կայցելի Ռուսաստանում Հայաստանի դեսպանատուն և Զինապալատ։
Ապրիլին տեղեկություն էր հրապարակվել, որ Մոսկվայի և Համայն Ռուսիո պատրիարք Կիրիլի միջնորդությամբ եռակողմ հանդիպում է նախապատրաստվում Լեռնային Ղարաբաղի հարցերը քննարկելու համար։ Նշվում էր, որ հանդիպմանը կմասնակցեն Ռուսաստանի և Հայաստանի եկեղեցիների ղեկավարները, Ադրբեջանի հոգևոր առաջնորդը, Կովկասի մահմեդականների վարչության նախագահ Ալահշուքյուր Փաշաձադեն։ Այս պահին հանդիպման ամսաթվի մասին հստակ տեղեկություն չկա»
