ԵՐԵՎԱՆ, 14 մայիսի — Sputnik. Երևանի գործող քաղաքապետ Տարոն Մարգարյանը ավագանու ընտրություններին քվեարկեց` հույս ունենալով տեսնել «ապագայի քաղաքի» կառուցումը։
Գործող քաղաքապետը Ավան վարչական շրջանի 177 դպրոցում գտնվող 01/19 ընտրատեղամաս եկավ կնոջ և երեխաների հետ։
«Բարձր տրամադրություն ունեմ։ Քվեարկում եմ հանուն ապագայի Երևանի։ Ուզում եմ զարգացող մայրաքաղաք տեսնել», — ասաց Մարգարյանը։
Այն հարցին, թե ինչպես է գնահատում իր շանսերը, քաղաքապետը պատասխանեց, որ քիչ ժամանակ է մնացել, և շուտով պարզ կլինի, թե ում ծրագրերն են նախընտրում երևանցիները։
«Մեր նախընտրական քարոզարշավը նորմալ ենք գնահատում», — ասաց Մարգարյանը։
Մարգարյանը հերքեց «Ելք» դաշինքի ներկայացուցիչների` ընտրակաշառք տալու վերաբերյալ «հրահանգների» և ՀՀԿ-ի կապը։
Ինչ վերաբերում է բանավեճին չմասնակցելուն, քաղաքապետը բացատրեց, որ իրենք ավելի նպատակահարմար գտան իրենց ծրագիրը քաղաքացիներին ներկայացնել ընտրողների հետ անցկացրած ավելի քան 100 հանդիպումների շրջանակում։
Նշենք, որ ընտրություններին քաղաքական երեք ուժ է մասնակցում` ՀՀԿ-ն, «Երկիր ծիրանի» կուսակցությունն ու «Ելք» դաշինքը։
Հայաստանի հանրապետական կուսակցության քաղաքապետի թեկնածուն գործող քաղաքապետ Տարոն Մարգարյանն է։ «Երկիր ծիրանի» կուսակցության թեկնածուն` Զարուհի Փոստանջյանը, իսկ «Ելք» դաշինքինը` Նիկոլ Փաշինյանը։
