ԵՐԵՎԱՆ, 14 մայիսի — Sputnik. Երևանի քաղաքապետի թեկնածու Նիկոլ Փաշինյանը ընտրատեղամաս եկավ ոտքով` ընտանիքի անդամների հետ։ Քաղաքացիական պարտքը կատարելուց հետո նա պատասխանեց լրագրողների մի քանի հարցի։
Փաշինյանի խոսքով` ինքն ու իր թիմակիցները հույս ունեն հաղթել ավագանու ընտրությունների արդյունքում։
Պատասխանելով այն հարցին, թե կարող եք արդյոք «սակավաթիվ անդամներով փոփոխություններ կատարել ավագանիում», Փաշինյանը պատասխանեց, որ իրենք քիչ անդամ չեն կարող ունենալ։
«Կարծում եմ, որ այն ինչ տեղի է ունենում, հուսահատության արտահայտություն է, մենք պետք է հաղթահարենք դա։ Եթե Երևանում հաղթահարեցինք, ապա Հայաստանում էլ դա կվերանա», — նշեց Փաշինյանը` պատասխանելով Sputnik Արմենիայի հարցերին։
«Կընդունի՞ դաշինքն այսօրվա ընտրությունների արդյունքները» հարցին Փաշինյանը պատասխանեց` «ցանկացած արդյունք ի գիտություն կընդունենք»։
Ժամը 08:00-ին բացվեցին բոլոր 474 ընտրատեղամասերը։ Ընտրություններին քաղաքական երեք ուժ է մասնակցում` ՀՀԿ-ն, «Երկիր ծիրանի» կուսակցությունն ու «Ելք» դաշինքը։
Հայաստանի հանրապետական կուսակցության քաղաքապետի թեկնածուն գործող քաղաքապետ Տարոն Մարգարյանն է։ «Երկիր ծիրանի» կուսակցության թեկնածուն` Զարուհի Փոստանջյանը, իսկ «Ելք» դաշինքինը` Նիկոլ Փաշինյանը։
Ըստ ընտրական օրենսդրության` կուսակցության կամ դաշինքի ցուցակի ընտրական ցուցակը գլխավորող առաջին համարի թեկնածուն համարվում է նաև քաղաքապետի թեկնածուն, և նա ուղղակիորեն, առանց ավագանու որոշման կարող է ընտրվել, եթե այդ կուսակցությունը կամ դաշինքը ստանա մանդատների մեծամասնությունը։ Եթե առաջին համարը հրաժարվի քաղաքապետի պաշտոնից, ապա քաղաքապետին կընտրի ավագանին։ Ավագանու ընտրություններին դիտորդական առաքելություն կիրականացնի միջազգային մեկ կազմակերպություն՝ Եվրոպայի խորհրդի տեղական և տարածքային իշխանությունների կոնգրեսը (ԵԽ ՏՏԻԿ), ինչպես նաև տեղական 17 հասարակական կազմակերպություն (5138 դիտորդ)։ Ավագանու ընտրություններին կհաջորդի քաղաքապետի ընտրությունը։
