Մայիսի 3-ին լույս աշխարհ եկած հնգյակ նորածիններից տղայի վիճակում, որը շարունակվում է մնալ ծայրահեղ ծանր, երեկվանից այնուամենայնիվ նկատվում են որոշակի կայունացման միտումներ: Այս մասին Sputnik Արմենիային հայտնեց ՀՀ ԱՆ գլխավոր մանկական ռեանիմատոլոգ Հրանտ Կալենտերյանը։
«Երեկ ամբողջ օրը նկատվել է որոշակի կայունացում։ Դեմքի գույնն է կարգավորվել և ընդհանուր վիճակը»,- ասաց նա:
Նրա խոսքով` փոքրիկը շարունակում է շնչել արհեստական սարքով։ Մյուս երկու երեխաների վիճակը նույնպես փոքր-ինչ լավացել է և շարունակում է մնալ կայուն։
«Կյանքի պայքար է գնում, և ինչ-որ կանխատեսումներ անելը վաղ է, քանի դեռ նրանց քաշը չի հասել 1700 գրամի»,- ասաց Կալենտերյանը։
Հիշեցնենք, որ մայիսի 3-ին Արշալույս գյուղի 23-ամյա բնակիչ Լուսինե Պողոսյանը լույս աշխարհ էր բերել միանգամից 5 զավակ` չորս աղջիկ և մեկ տղա։ Փոքրիկներից մեկը մահացել էր մայիսի 6-ին, մյուսը` 7-ին։
