ԵՐԵՎԱՆ, 10 մայիսի- Sputnik. Սերբիայի Նովի Սադ քաղաքում կայացած Եվրոպայի առաջնությունում մեր հավաքականը, մասնավորապես, Վոլոդյա Ֆրանգուլյանը, Գրիգոր Գրիգորյանը և Լևան Բերիանիձեն նվաճեցին բրոնզե մեդալներ:
«Ես հավաքականը գլխավորել եմ փետրվար ամսից ու ուրախ եմ, որ այս կարճ ժամանակահատվածում կարողացա նման արդյունքի հասնել: Բայց նշեմ, որ այս հաջողությունը միայն իմ աշխատանքով չի պայմանավորված: Մարզչական ամբողջ շտաբը` բժիշկը, ըմբիշները, բոլորն էլ լումա ունեն մեդալների մեջ» — այսպես սկսեց իր խոսքը Արմեն Մկրտչյանը` ամփոփելով Եվրոպայի առաջնության արդյունքները:
Ազատ ոճի հավաքականի երեք բրոնզե մեդալներն, իհարկե, հույս են ներշնչում ապագայում ավելի լավ արդյունքներ ունենալու։ Մեր տղաների ցուցադրած արդյունքը կարող էր, իրոք, ավելի հնչեղ լիներ. «Գրիգոր Գրիգորյանն ու Լևան Բերիանիձեն շատ լավ անցկացրին մրցաշարը և կիսաեզրափակիչում շատ լավ հնարավորություն ունեին հաղթելու, սակայն չստացվեց: Կարևորն այն է, որ ներուժ ունենք, ու, իհարկե, կքննարկենք սխալներն ու կաշխատենք ապագայում նոր հաջողությունների հասնել»,-նշեց Արմեն Մկրտչյանը:
Իրենց ելույթների մասին խոսելիս` և՛ Վոլոդյա Ֆրանգուլյանը, և՛ Գրիգոր Գրիգորյանը նշեցին մինչև Եվրոպայի առաջնությունը կատարված մեծ աշխատանքի մասին: Ուսումնամարզական հավաքներն ու մարզիչների հետ առանձնազրույցներն իրենց արդյունքը տվել են` ըստ ըմբիշների: Գրիգոր Գրիգորյանը, մասնավորապես, նշեց.«Ես շատ լավ մարզավիճակում էի, ու կարող էի պայքարել ոսկե մեդալի համար: Կիսաեզրափակիչում թուրք ըմբիշի դեմ մեկ վրիպում թույլ տվեցի ու 6:8 հաշվով պարտվեցի: Համենայնդեպս, ուրախ եմ, որ մեդալ եմ վաստակել և գիտակցում եմ, որ կարող եմ ավելիին հասնել ապագայում»:
Վոլոդյա Ֆրանգուլյանն առաջի անգամ կանգնեց պատվո պատվանդանին: Իհարկե, այս արդյունքն արդեն բազմափորձ ըմբիշի համար ուրախալի է:
«Ինձ համար շատ կարևոր հաղթանակ էր բրոնզե մեդալի համար գոտեմարտում, քանի որ նույն թուրք ըմբիշին պարտվել էի Թուրքիայում կայացած մրցաշարում: Ազատ ոճի ըմբշամարտում խոստումներ տալը իմաստ չունի, որովհետև բոլորն էլ ուզում են հաղթել, ու մեկ ակնթարթում կորցնում են այդ հաղթանակը: Դրա համար խոստումներ չեմ տա, բայց ամեն ինչ կանեմ, որպեսզի հասնեմ նոր հաջողությունների»-նշեց Ֆրանգուլյանը:
Հավաքականի գլխավոր մարզիչը, խոսելով մյուս հայ ըմբիշների մասին, ավելացրեց, որ բոլորն էլ գոտեմարտել են իրենց հնարավորությունների սահմաններում և բոլորից էլ գոհ է: Կարևորվեց այն փաստը, որ հավաքականի տղաները բոլորն էլ կարող են մեդալ նվաճել յուրաքանչյուր մրցաշարում: Մարզչի կարծիքով` հավատալ է պետք ու աշխատել:
