ԵՐԵՎԱՆ, 5 մայիսի — Sputnik. Մրցումների վերջին օրը Հայաստանը ներկայացնող Վալտեր Մարգարյանը 70 կգ քաշային կարգում պարտվեց առաջին գոտեմարտում, իսկ Լևան Բերիանիձեն պարտություն կրեց քառորդ եզրափակիչում:
Վալտեր Մարգարյանը միավորների մեծ առավելությամբ՝ 0:11 զիջեց ռուսաստանցի Իսրայել Կասումովին: Ու քանի որ վերջինս պարտվեց կիսաեզրափակիչում, մեր ըմբիշը զրկվեց նաև բրոնզե մեդալի համար պայքարից: Իսկ ահա գերծանր քաշային Լևան Բերիանիձեյի համար մրցումներն այլ կերպ դասավորվեցին:
Առաջին գոտեմարտում Բերիանիձեն հաղթանակի հասավ մոլդովացի Անդրեյ Ռոմանովի նկատմամբ: Քառորդ եզրափակչում Լևանը համառ պայքարում պարտվեց ադրբեջանցի Ջամալեդին Մագոմեդովին՝ 1:3: Վերջինս հասավ եզրափակիչ ու Բերիանիձեն հնարավորություն ստացավ սփոփիչ գոտեմարտ անցկացնելու` բրոնզե մեդալի համար:
5:2 հաշվով հաղթանակի հասնելով Բելգիան ներկայացնող Հաջի-Մուրադ Իստապաևի նկատմամբ`Բերիանիձեն իրավունք վաստակեց արդեն երեկոյան մրցահերթում բրոնզե մեդալի համար գոտեմարտ անցկացնելու: Մեր ըմբիշի մրցակիցն է լինելու Սլովակիան ներկայացնող Սոսլան Գագլոևը:
Ավելացնենք, որ ազատ ոճայինների մրցումներից հետո արդեն մրցագորգը տրամադրվելու է հունահռոմեական ոճի ըմբիշներին: Այս մրցաձևում մենք, բնականաբար, սպասելիքներ ունենք մեր հավաքականի բոլոր մարզիկներից:
