ԵՐԵՎԱՆ, 10 մայիսի — Sputnik. «Եվրատեսիլ» երգի միջազգային մրցույթի հայաստանյան մասնակից Արծվիկ Հարությունյանը շնորհակալ է ռուս երգչուհի Պելագեային մրցույթի եզրափակչից առաջ նրան ցուցաբերած բարոյական աջակցության համար։ Այդ մասին նա պատմել է Sobesednik.ru-ին տված հարցազրույցում։
«Նույնիսկ այսօր է հաղորդագրություն ուղարկել։ Անհանգստանում է։ Գրում է, որ սիրում է ինձ, որ ամեն ինչ լավ կլինի։ Մենք կապ ենք պահպանում, և ես անչափ շնորհակալ եմ նրան դրա համար։ Նա ոչ միայն ուսուցիչ է, այլև ընկեր։ Խորհուրդներ ոչ միայն նա է տվել, այլև նրա մայրը` Սվետլանան»,- պատմել է Արծվիկը։
Ռուսական «Գոլոս» նախագծին մասնակցած Արծվիկ Հարությունյանը հանդես էր գալիս ժյուրիի անդամներից մեկի` Պելագեայի, թիմում։ Արծվիկը խոստովանեց, որ եզրափակչից առաջ նա հրաշալի տրամադրություն ունի, բոլոր մարդիկ էլ «բարի, գեղեցիկ և դրական» են։
