ԵՐԵՎԱՆ, 10 մայիսի-Sputnik. ՄՌՏ հետազոտությունը սովորաբար տևում է մոտ մեկ ժամ։ Կլաուստրաֆոբիա ունեցող մարդիկ դժվարությամբ կամ, ընդհարապես, չեն կարողանում այդքան ժամանակ պառկել փակ տարածքում։ «Հերացի» թիվ մեկ համալսարանական կլինիկայում այլընտրանքի հնարավորություն կա։
«Մեր կենտրոնում գործում են երկու տոմոգրաֆներ, այսինքն` ունենք ցածր և բարձր մագնիսական դաշտով գործող տոմոգրաֆներ։ Մի ապարատը բաց է, մյուսը` փակ»,- ասաց «Հերացի» թիվ մեկ համալսարանական կլինիկայի բժիշկ-ռադիոլոգ Հայկանուշ Զաքարյանը։
Նախորդ տարվանից համալսարանական կլինիկայում իջեցրել են ախտորոշման գները։ Այս պահին դրանք շուկայականից զգալի ցածր են։ Ըստ այդմ, ցածր մագնիսական դաշտով գործող տոմոգրաֆի դեպքում գինը 35 հազար դրամ է, իսկ բարձր մագնիսական դաշտով գործող տոմոգրաֆի դեպքում` 50 հազար դրամ։
«Պետք է շեշտեմ, որ մեր կլինիկայում հիվանդները հետազոտվում են նաև պետպատվերի շրջանակում»,- ասաց մասնագետը։
«Հերացի» թիվ մեկ համալսարանական կլինիկայում հետազոտվողների համար կարևորագույն առավելություն է «երկու կարծիք» գաղափարի ներդրումը։
«Հետազոտության արդյունքներն ուղարկում ենք ԱՄՆ Ֆիլադելֆիա նահանգի «Թոմաս Ջեֆերսոն» համալսարանական կլինիկա երկրորդ կարծիքի համար, որը շատ մեծ հնարավորություն է տալիս հետազոտությունների որակի, վերահսկման, նաև հետազոտության եզրակացության տեսանկյունից»,- ասաց Հայկանուշ Զաքարյանը։
Տեղեկացնենք, որ «Թոմաս Ջեֆերսոն» կլինիկան իր հատուկ տեղն է զբաղեցնում ԱՄՆ համալսարանական կլինիկաների լավագույն տասնյակում։
Մագնիսա-ռեզոնանսային տոմոգրաֆիան բացարձակ անվնաս է։ Հակացուցումներ կան, բայց դրանք վերաբերում են այն մարդկանց, ում մարմնում կան մետաղային կտորներ կամ իմպլանտներ։ Պատճառն այն է, որ հետազոտական սենյակում կա մեծ մագնիսականություն։
