ԵՐԵՎԱՆ, 14 ապրիլի — Sputnik. Պետական բյուջեի հաշվին ապահովագրությունը նախատեսվում է տրամադրել սոցիալապես անապահով խավերին։ Իսկ մյուս քաղաքացիները պետք է ձեռք բերեն ապահովագրական փաթեթներ, որոնցում ներառված կլինեն սրտի և նմանատիպ այլ վիրահատությունները։ Ապահովագրական փաթեթները, առողջապահության նախարար Լևոն Ալթունյանի խոսքով, մշակման փուլում են։
«Այդ քայլը թույլ կտա մեզ բյուջեի գումարներն ուղղել զուտ սոցիալապես անապահով խավերի բուժման նպատակով»,- ասաց նախարարը։
Նա նշեց, որ իրենց գործողություններն համընթաց են առողջապահության համաշխարհային կազմակերպության 20/20 ծրագրին։
«Ծրագրի հիմնական նպատակն է` սոցիալական բոլոր խավերին ապահովել տվյալ երկրում առկա բժշկական ծառայություններից օգտվելու հավասար հնարավորություն։ Դրա համար էլ որոշեցինք մշակել այդ ծրագիրը»,- ասաց առողջապահության նախարարը։
Լևոն Ալթունյանը տեղեկացրեց, որ այսօր Հայաստանում ապահովագրված է 60-80 հազար բնակիչ։ Նրա դիտարկմամբ` ապահովագրվածների 99 տոկոսը գոհ է գործող ծրագրերից։
«Ինձ հասած տվյալներով և շփվելով բնակչության հետ` ես գիտեմ, որ Հայաստանի բոլոր բնակիչները կուզենային ունենալ ապահովագրական ծածկույթ»,-ասաց նախարարը։
Նա վստահեցրեց` պարտադիր ապահովագրությունը բժշկության ոլորտում ընկալվում է որպես ամենաարդյունավետ և ամենախիստ վերահսկողություն տրամադրող համակարգ։ Այդ հնարավորությունը չունի պետությունը, բայց ունի ապահովագրական ընկերությունը։
