ԵՐԵՎԱՆ, 10 մայիսի — Sputnik, Նարե Խաչատրյան. Մարմնի նորմալ քաշի պահպանումն այսօր համաշխարհային խնդիր է դարձել: Նիհար լինելու համար մարդիկ առավել հաճախ անցնում են նույն ճանապարհով՝ սոված են մնում:
Դիետա հասկացությունը տարիների ընթացքում փոխվել է: Որոշ մասնագետների կարծիքով՝ դիետան նյութափոխանակության խանգարման ամենակարճ ճանապարհն է և սթրեսի առաջնային աղբյուր, իսկ որոշ մասնագետներ համոզված են՝ դիետան առողջ ապրելակերպն է:
Եվ քանի որ ավելորդ քաշը, ճարպակալումը նպաստում են տարբեր հիվանդությունների առաջացմանը, դրանից խուսափելու համար մարդիկ դիմում են տարբեր դիետաների:
Դիետոլոգ-սննդաբան Լիլիթ Բաբասյանը նշում է, որ կարևորը ոչ թե դիետան է, այլ առողջ սնունդը։
«Ճիշտ չէ մեկ ամիս դիետա պահել, հետո գնալ մեկ ուրիշ դիետոլոգի մոտ։ Վերջինս էլ մեկ ուրիշ դիետա կնշանակի: Մարդուն պետք է սովորեցնել ճիշտ սնվել, եւ եթե տվյալ անձը սնվելու կոնկրետ ժամերը պահեց, ապա երբեք չի գիրանա»:
Սննդաբանի խոսքով`նորմայից ցածր քաշը նույնպես ցանկալի չէ: Դա կարող է հիվանդության նշան լինել, քանի որ մարմինը չի ստանում բոլոր անհրաժեշտ սննդանյութերը: Իսկ հոգեբան, հոգեթերապևտ Սաթեն Գրիգորյանի համոզմամբ՝ դիետաներին հետևելու համար պարտադիր չէ դիմել դիետոլոգներին, քանի որ մարդկանց օրգանիզմներն ու անհատական չափանիշները տարբեր են:
Սաթեն Գրիգորյանի կարծիքով՝ մարդիկ առավել հաճախ դիետաների են դիմում, երբ ինքնագնահատականի հետ կապված որոշակի խնդիրներ են ունենում. «Սովորաբար, նման դեպքերում մարդիկ վերցնում են որևէ մեկի կերպարը որպես չափանիշ և փորձում են նրան նմանվել: Դրանք կարող են լինել շոուբիզնեսի աստղերը կամ որոշակի իդեալ, որին մոտ են նրա սկզբունքները»:
Բացի գեղեցկություն պարգևելուց, սննդից հրաժարումը, ախորժակի հիվանդագին բացակայությունը նաև առողջական խնդիրներ է «պարգևում»՝ ի վերջո հանգեցնելով նյարդային անորեքսիայի:
Հոգեթերապևտ Անահիտ Խաչատրյանի խոսքով՝ կարճ ժամանակի ընթացքում հիվանդությունը հանգեցնում է արագահաս նիհարելուն, հյուծվելուն, իսկ երբեմն՝ նույնիսկ մահվան:
Ըստ գիտնականների՝ երեկոյան 7-8 ընկած ժամանակահատվածում մարդկանց 48%-ը հրաժարվում է օգտակար սննդից, իսկ ամենավտանգավոր ժամանակը կիրակի երեկոն է: Այդ մասին են վկայում արտասահմանյան մասնագետների՝ 750 մարդու շրջանում իրականացրած հետազոտությունները:
Հայտնի է, որ ուտելը նաև ապրումները հաղթահարելու միջոց է: Մեծ մասամբ շատ ուտելը կախված է աշխատանքից. որքան գործերը վատ են, այնքան մարդիկ շատ են ուտում:
