ԵՐԵՎԱՆ, 8 մայիսի — Spunik. Երևանի զինանշանի հեղինակ Ալբերտ Սոխիկյանի մահվան կապակցությամբ ցավակցական ուղերձ է հղել Երևանի քաղաքապետ Տարոն Մարգարյանը։
«Ցավով տեղեկացա, որ կյանքից հեռացել է ՀՀ վաստակավոր ճարտարապետ, մայրաքաղաքի խորհրդանիշներից մեկի՝ Երևանի զինանշանի հեղինակ Ալբերտ Սոխիկյանը:
Հայտնի նկարիչ-ճարտարապետն ուրույն դեր ուներ արդի Հայաստանի մշակութային կյանքում: Ալբերտ Սոխիկյանը մեծ ներդրում է ունեցել նաև Երևանի հոգևոր-մշակութային կերպարի ձևավորման գործում: 1993-97թթ. նա եղել է Երևանի գլխավոր նկարիչը:
Խորապես ցավակցում եմ Ալբերտ Սոխիկյանի ընտանիքին, հարազատներին ու մերձավորներին»,-ասված է ուղերձում:
ՀՀ վաստակավոր ճարտարապետ Ալբերտ Արտաշեսի Սոխիկյանը ծնվել է 1947թ.- ի նոյեմբերի 27-ին, Երևանում։ 1965-1971 թթ. սովորել է Երևանի պոլիտեխնիկական ինստիտուտում։ 1971-1972 թթ. աշխատել է Հայպետնախագիծ ինստիտուտում։ 1972-1978 թթ.` Տեխնիկական էթիկայի համամիութենական գիտահետազոտական ինստիտուտի հայկական մասնաճյուղի նկարիչ-կոնստրուկտորն էր, 1978-1979 թթ.` «Ալգորիթմ» գիտահետազոտական կենտրոնի դիզայնի բաժնի վարիչը։ 1982 թվականին վերապատրաստվել է Մոսկվայի ճարտարապետական ինստիտուտում։
1979-1992 թթ. Սոխիկյանը եղել է Երևանի պոլիտեխնիկական ինստիտուտի նկարչության ամբիոն ավագ դասախոս, 1993-1997 թթ.-ներին նա Երևան քաղաքի գլխավոր նկարիչն էր, 1992 թվականից ԵՃՇՊՀ-ի գծանկարի, գունանկարի և քանդակի ամբիոնի դասախոս, դոցենտ, պրոֆեսոր։ 2002 թվականից ԵՐՃՇՊՀ-ի գծանկարի, գունանկարի և քանդակի ամբիոնի վարիչ, ԵՐՃՇՊՀ-ի ավագանու անդամ, ՀՃՄ և ՀԴՄ անդամ:
Մասնակցել է միջազգային, համամիութենական, հանրապետական և անհատական ցուցահանդեսների։
