Թե երբ, ի վերջո, Երևանի կենտրոնում կիրականանա «Հին Երևան» նախագիծը, մշակույթի նախարար Արմեն Ամիրյանը չգիտի, բայց վստահեցնում է, որ դրա իրականացմանը ոչինչ չի խանգարում:
«Ներդրողները պետք է իրականացնեն իրենց գործառույթները, կառավարությունն էլ` իր` չխանգարելով միմյանց ու պահպանելով Երևանի պատմամշակութային միջավայրը»,- այսօր կառավարության նիստից հետո, պատասխանելով լրագրողների հարցերին, ասաց Ամիրյանը:
Հիշեցնենք` ապրիլի 22-ին վարչապետ Կարեն Կարապետյանի գլխավորությամբ կառավարությունում տեղի էր ունեցել խորհրդակցություն, որի ընթացքում քննարկվել էր «Հին Երևան» նախագծի իրականացման ընթացքը: Վարչապետը պատասխանատու ոլորտների ղեկավարներին հանձնարարել էր ուշադրություն դարձնել ոչ միայն հուշարձան շենքերի վերականգնմանը, այլև ներդրումների ներգրավմանն ու շինարարության ոլորտի զարգացմանը:
«Հին Երևանը» մայրաքաղաքի կենտրոնում ապամոնտաժված պատմամշակութային հուշարձան շենքերի վերականգնման ծրագիր է, որը պետք է իրականացվի գլխավոր պողոտայի՝ Աբովյան, Փավստոս Բուզանդ, Եզնիկ Կողբացի և Արամի փողոցներով պարփակված հատվածում:
Ծրագրի ավարտի նախանշված վերջնաժամկետը 2010-2011 թվականներն էին: Ավելի ուշ՝ 2014 թվականին կառավարությունը «Մուլտիկոնտինենտալ Դիստրիբյուշն» ՍՊԸ-ի հետ նախագծի կառուցապատման աշխատանքները վերսկսելու համաձայնագիր կնքեց, որի համաձայն` շինարարական աշխատանքները պետք է վերսկսվեին 2015թ-ին:
Անցել է 2 տարի, բայց այդ տարածքում շինարարություն դեռ չի իրականացվել:
