ԵՐԵՎԱՆ, 8 մայիսի — Sputnik. Գյումրու թիվ 2 գերեզմանատան եղբայրական գերեզմանը կառուցվել է 1975 թվականին: Ամեն տարի, այս օրը հայրենիքի ազատագրման համար իրենց կյանքը զոհած տարբեր ազգերի ավելի քան հարյուր զինվորների հիշատակի կարգ է կատարվում այստեղ: Եղբայրական գերեզմանում ամփոփված են հիմնականում այն զինվորականների աճյունները, ովքեր, վիրավորվելով Մեծ Հայրենականի ժամանակ, բուժման նպատակով եկել էին Հայաստան:
Մինչ պսակներ դնելու արարողությունը, որին մասնակցեցին նաև մարզային և քաղաքային իշխանությունների, Գյումրու կայազորի ներկայացուցիչները և զինվորականները, ձեռամբ ռուս ուղղափառ եկեղեցու հովիվ հայր Անդրեյ Վացի կատարվեց հոգեհանգստի կարգ: Ներկաները մեկ րոպե լռությամբ հարգեցին պատերազմի զոհերի հիշատակը:
«Ամեն տարի բարի ավանդույթի նման մենք հավաքվում ենք այստեղ՝ հիշատակելու բոլոր նրանց ովքեր իրենց կյանքը զոհեցին հանուն խաղաղության: Մեր երկրները ուս-ուսի անհավանական մի բան արեցին՝ մեզ ապրելու, քաղաքներ ու մեր ապագան կառուցելու հնարավորություն տալով: Ու նրանք այդ ամենն անում էին հաղթանակի հավատով»,-իր խոսքում նշեց Հայր Անդրեյը:
«Ուզում եմ բոլորին շնորհավորել Մեծ հայրենականի հաղթանակի առթիվ: Մեր հայրերն ու պապերը հաղթանակ տարան՝ շատ թանկ գնով: Խաղաղությունն այս կյանքում ամենակարևորն է»,- Sputnik Արմենիայի հետ զրույցում նշեց ՌԴ փոխհյուպատոս, հյուպատոսի ժամանակավոր պաշտոնակատար Ալեքսանդր Կոչեգարովը:
«Մենք պետք է միշտ հարգենք մեր պապերին՝ նրանց, ում կյանքի գնով ենք ձեռք բերել խաղաղությունը: Նրանք իրենց պարտքն էին կատարում հայրենիքի հանդեպ, այնպես, ինչպես մենք այսօր ու մենք պետք է այնպես անենք, որ լինենք նրանց արժանի հետևորդները»,-նշեց Գյումրիում տեղակայված 102-րդ ռազմաբազայի հրամանատար Վլադիմիր Ելկանովը:
