ԵՐԵՎԱՆ, 7 մայիսի — Sputnik, Արմենուհի Մխոյան. «Մարդկանց մոլորակ» շարժման և Ջագ-Բամբիռի համագործակցության արդյունքում ծնված «Կապույտ գնդակ» խորագրով ցուցահանդեսն ու համերգը այս ծրագրի շրջանակներում նախատեսված միջացառումներից առաջինն էր՝ Գյումրիի քաղաքապետարանի, Gallery 25-ի և Բուրսայի Նիլուֆերի քաղաքապետարանի հետ համատեղ իրականացված: Նախագիծը ոչ միայն Բուրսայում է իրականացվում, այլ նաև Ստամբուլում: Նշենք, որ Ստամբուլի «Դեպո» ցուցասրահում ցուցահանդեսը կշարունակվի մինչև մայիսի 14-ը:
Այն, որ նախագիծն հաջողված է ու դեռ կունենա իր շարունակությունը վկայում էին նախ Բուրսայում, ապա նաև Ստամբուլում կայացած համերգներն ու ցուցադրությունները: Ջերմ ընդունելություն ու կրկին հանդիպելու առաջարկներ: Բուրսայի Նիլուֆերիի Konak մշակութային կենտրոնում հանդիսատեսը երկար ժամանակ ծափերով ողջունում էր արդեն հավանած Ջագ-Բամբիռին, իսկ համերգին ներկա Նիլուֆերի քաղաքապետի խորհրդական Սիբեր Օզերը Sputnik Արմենիային վստահեցրեց՝ համագործակցության լավ մեկնարկ է տրվել, որը շարունակություն կունենա:
«Սա Անադոլու Քյուլթուրի, Բուրսայի Նիլուֆերի քաղաքապետարանի և Գյումրիի քաղաքապետարանի, Gallery 25-ի համատեղ համագործակցության երկրորդ միջոցառումն էր. արդեն մի ցուցահանդես ունեցել ենք, սա էլ՝ Բամբիռի հրաշալի համերգը, իսկ առաջիկայում Նիլուֆերի քաղաքապետարանի թատրոնն է այցելելու Գյումրի՝ խաղալու Հակոբ Պարոնյանի «Ատամնաբույժն արևելյան» պիեսը: Սա, հուսով եմ, նախադեպ կհանդիսանա համագործակցության` դառնալով ավանդույթ՝ շարունակական փոխայցերով»,-նշեց Սիբեր Օզերը` նաև կիսելով իր տպավորությունը համերգից՝ «անչափ հավանեցի ու հուզվեցի: Խաղաղության ու բարեկամության
շունչը զգացի»:
Բամբիռ ռոք խումբը հիմնվել է Գյումրիում, 1978 թ. Գագիկ /Ջագ/ Բարսեղյանի կողմից: Լինելով Սովետական Միության լավագույն ռոք խմբերից մեկը՝ Բամբիռը հիմնականում կատարում է ավանդական հայկական երաժշտություն, ներկայացնում Կոմիտասի ու միջնադարյան հայկակական ժողովրդական ստեղծագործությունները՝ ժամանակակից մեկնաբանությամբ: Ի դեպ, հենց այս կատարումներից մի քանիսը ևս հնչեցին համերգների ընթացքում: «Կապույտ գնդակ»-ը Ջագ Բարսեղյանի ստեղծագործությունն է, այն գովերգ է՝ նվիրված կապույտ մոլորակին՝ երկրագնդին: Երգը միավորում է երկրագնդի մարդկանց, ովքեր պատասխանատու են մոլորակի համար:
«Մարդկանց մոլորակը» շարժման շրջանակներում ներկայացվեց նաև 12 հայ արվեստագետի ավելի քան 50 գործ և ևս 3 վիդեո-արտ:
«Մենք արդեն մի քանի նախագիծ իրականացրել ենք հայ և թուրք արվեստագետների մասնակցությամբ: Նմանտիպ նախագծերն օգնում են երկու երկրների արվեստագետներին՝ ներկայացնելու իրենց արվեստը: Արվեստն ու մշակույթը շատ գործուն և կարևոր հիմք են՝ հասկանալու ու երկխոսություն սկսելու, քանի որ երբ նրանք աշխատում են միասին, ներկայացնում իրենց գործերը, արդեն վստահում են միմյանց, և ավելի հեշտ է իրենց համար խոսել տարբեր խնդիրների մասին: Արվեստն ու մշակույթը փոխում են մարդկանց»,-նշեց Անադոլու Քյուլթուրի նախագահ Օսման Կավալան:
«Մարդկանց մոլորակ» մշակութային ու հասարակական շարժումը հիմնվել է Գյումրիում Արմեն Տեր-Մկրտչյանի և Գևորգ Սարգսյանի կողմից: Նախաձեռնությանն աջակցել է «Գալերի 25»–ի ղեկավար Ալեքսան Տեր–Մինասյանը։
Շարժման հիմնական գաղափարախոսությունն ամփոփված է «Աշխարհի միակ շքեղությունը մարդկային շփման շքեղությունն է» արտահայտությամբ, որը վերցվել է Էքզյուպերիի «Մարդկանց մոլորակ» պատմվածքից:
Սերտորեն համագործակցելով Gallery 25-ի հետ՝ շարժումը իրականացնում է համերգներ, ցուցահանդեսներ, պերֆորմանսներ և ուսումնասիրություններ: «Կապույտ գնդակ» ցուցահանդեսին ներկայացված են Վազգեն Փահլավունի Թադևոսյանի, Հայկ Ադամյանի, Վահան Թոփչյանի, Աղավնի Ղազարյանի, Էդ Թադևոսյանի, Լևոն Ֆլջյանի, Արմեն Տեր-Մկրտչյանի, Գևորգ Սարգսյանի, Հրաչ Վարդանյանի, Կարեն Բարսեղյանի, Գոհար Մարտիրոսյանի և Գագիկ Ղազարեի գործերը:
