ԵՐԵՎԱՆ, 5 մայիսի — Sputnik. Աշխարհի նախկին ռակետ, Ֆեդերացիայի գավաթում Ռումինիայի հավաքականի նախկին ավագ Իլիե Նաստասեն չի ստացել Ուիբմբլդոն-2017-ին թագավորական օթյակում նստելու հրավեր, հայտնում է ProSport պորտալը։
«Նրանք այդպես վարվեցին Սերենա Ուիլյամսի երեխայի հասցեին ասածիս համար։ Եթե ես որևէ հիմար արարք թույլ տայի ինձ, ես կհասկանայի նրանց որոշումը, իսկ այսպես ես նրան չեմ հասկանում։ 1973 թվականին, երբ մյուսները բոյկոտում էին Ուիմբլդոնը, ես եկա և խաղացի, սակայն դա այլևս կարևոր չէ։ Եթե նրանք որոշել են տխմարություն անել, ես ոչինչ անել չեմ կարող»,- ասաց Նաստասեն։
Ավելի վաղ հայտնել էին, որ Թենիսի միջազգային ֆեդերացիան (ITF) հետաքննություն է սկսել ռումինացի թենիսիստ Իլիե Նաստասեի այն խոսքերից հետո, թե ամերիկուհի Սերենա Ուիլյամսի ապագա երեխայի մաշկը կաթնային շոկոլադի գույն է ունենալու։
Ինքը` Ուիլյամսը, պատասխանել է նրան. «Ինձ հիասթափություն է պատճառում այն, որ Իլիե Նաստասեի նման մարդիկ կարող են ռասիստական մեկնաբանություններ անել իմ և դեռ չծնված երեխայիս, հարազատներիս հասցեին ռասիստական արտահայտություններ անել»։
Ապրիլի 19-ին հայտնի դարձավ, որ թենիսիստուհին, որը սեպտեմբերին կդառնա 36-տարեկան, երեխայի է սպասում։ Երեխան կծնվի աշնանը։ Երեխայի հայրը ամերիկահայ գործարար Ալեքսիս Օհանյանն է, որի հետ նշանադրության մասին Սերենան հայտարարեց անցյալ տարվա դեկտեմբերին։
Ինչպես գրում է Hello պարբերականը, այժմ Սերենան գտնվում է հղիության հինգերորդ կամ վեցերորդ ամսում, այնպես որ երեխան կծնվի ամռան վերջին կամ աշնան սկզբին։ Ուիլյամսի խոսքով՝ երեխայի սեռը դեռ չգիտեն։
Սերենա Ուիլյամսն ամերիկացի պրոֆեսիոնալ թենիսիստուհի է։ 2002 թվականի հուլիսի 8-ին նա դարձել է թիվ 1 ռակետը և վերին հորիզոնական վերադարձել 6 անգամ։ 2013 թ. փետրվարի 18-ին կրկին դարձել է առաջին ռակետը՝ միաժամանակ դառնալով Կանանց թենիսի ասոցիացիայի (WTA) պատմության ամենատարեց թիվ 1 ռակետը։ Սերենա Ուիլյամսը նաև ամենաշատ գումար վաստակած կին թենիսիստն է և կանանց շարքում առաջինն է, որի պարգևավճարները գերազանցել են 50 միլիոն դոլարը։ Գործող թենիսիստների շարքում Ուիլյամսը «Մեծ սաղավարտ» մրցաշարի ամենաշատ տիտղոսներ նվաճած մարզիկն է՝ մենախաղի, զուգախաղի և խառը զուգախաղի ընդհանուր ցուցանիշով։
