ԵՐԵՎԱՆ, 5 մայիսի — Sputnik. Ամերիկահայ գործարար Ալեքսիս Օհանյանն ասել է, որ իր ապագա երեխայի մոր՝ հանրահայտ թենիսիստուհի Սերենա Ուիլյամսի հաջողության գրավականը նրա մեծ սիրտն է։ Սերենա Ուիլյամսն ու Ալեքսիս Օհանյանն առաջին անգամ մայիսի 2-ին միասին ներկայացան Նյու Յորքում կայացած Met Gala-2017-ին։ Humans of New York պարբերականին տված հարցազրույցում Ալեքսիսն առաջին անգամ հանրության առաջ բացահայտեց իր զգացմունքները։
«Նա անասելի մեծ սիրտ ունի։ Բոլորը նրան ճանաչում են որպես հիանալի մարզիկ, սակայն բոլոր նրա հաջողությունների հետևում մեծ ու բարի սիրտ է թաքնված։ Նա ամբողջությամբ նվիրվում է բոլորին ու ամեն ինչին` ընկերությանը, սիրուն, շուտով նաև, համոզված եմ, մայրությանը»,- ասաց նա։
Ինչպես գրում է Hello պարբերականը, այժմ Սերենան գտնվում է հղիության հինգերորդ կամ վեցերորդ ամսում, այնպես որ երեխան կծնվի ամռան վերջին կամ աշնան սկզբին։ Ուիլյամսի խոսքով՝ երեխայի սեռը դեռ չգիտեն։
«Մենք պարզապես վայելում ենք սպասումը։ Մեզ համար անակնկալ է լինելու։ Այժմ մենք նրան պարզապես «փոքրիկ» ենք անվանում»,- ասել է Սերենան Vogue-ին տված հարցազրույցում։
Ապրիլի 19-ին հայտնի դարձավ, որ թենիսիստուհին, որը սեպտեմբերին կդառնա 36-տարեկան, երեխայի է սպասում։ Երեխան կծնվի աշնանը։ Երեխայի հայրը ամերիկահայ գործարար Ալեքսիս Օհանյանն է, որի հետ նշանադրության մասին Սերենան հայտարարեց անցյալ տարվա դեկտեմբերին։
«Ես արձակուրդում էի, հանգստանում էի, վայելում այդ ժամանակը։ Մինչ այդ ես ամեն շաբաթ լուսանկարում էի ինձ, որպեսզի տեսնեմ փոփոխությունները։ Նույնը ես արեցի նաև այն օրը։ Պահել եմ լուսանկարը, սակայն այդպես, երբեմն, լինում է սոցցանցերի հետ, սխալ կոճակ ես սեղմում և… Հեռախոսս չի զանգում հաճախ արձակուրդի ժամանակ, իսկ այստեղ 30 րոպե անց ես 4 բաց թողած զանգ տեսա։ Մտածեցի. «Զարմանալի է»։ Այնուհետև հասկացա, թե բանն ինչում է և ասացի, «Օ ո-ո-ոչ»», — խոստովանեց Ուիլյամսը։
Սերենա Ուիլյամսն ամերիկացի պրոֆեսիոնալ թենիսիստուհի է։ 2002 թվականի հուլիսի 8-ին նա դարձել է թիվ 1 ռակետը և վերին հորիզոնական վերադարձել 6 անգամ։ 2013 թ. փետրվարի 18-ին կրկին դարձել է առաջին ռակետը՝ միաժամանակ դառնալով Կանանց թենիսի ասոցիացիայի (WTA) պատմության ամենատարեց թիվ 1 ռակետը։ Սերենա Ուիլյամսը նաև ամենաշատ գումար վաստակած կին թենիսիստն է և կանանց շարքում առաջինն է, որի պարգևավճարները գերազանցել են 50 միլիոն դոլարը։ Գործող թենիսիստների շարքում Ուիլյամսը «Մեծ սաղավարտ» մրցաշարի ամենաշատ տիտղոսներ նվաճած մարզիկն է՝ մենախաղի, զուգախաղի և խառը զուգախաղի ընդհանուր ցուցանիշով։
