ԵՐԵՎԱՆ, 3 մայիսի – Sputnik. «Միսս ԱՊՀ 2017» գեղեցկության միջազգային մրցույթի եզրափակիչը տեղի կունենա 2017թ-ի հունիսի 6-ին Երևանում։ Այս մասին Sputnik Արմենիային հայտնեցին «Ալեքս Գրուպպ» ՍՊԸ պրոդյուսերական կենտրոնից։
ԱՊՀ անդամ երկրների գեղեցկուհիները արդեն հաղթել են իրենց երկրներում կայացած ընտրական մրցույթներում։
«Միսս ԱՊՀ» միջազգային գեղեցկության մրցույթը նոր մասշտաբային ծրագիր է, որը կազմակերպել են երկու բրենդային կազմակերպություններ՝ «Топ модель России» և «Российская красавица» համառուսական մրցույթների կազմակերպիչները:
Մրցույթի նպատակն է բացահայտել աղջիկների, որոնք ունակ են պատշաճ և բարձր մակարդակով ներկայացնել ԱՊՀ երկրները համաշխարհային կինոարտադրության և նորաձևության ասպարեզում, հաղթողի համար ապահովել պրոֆեսիոնալ զարգացում և մասնագիտական աճ, որին կհաջորդեն հրավերներն աշխարհահռչակ մոդելային տների, տարբեր պրոդյուսերական ընկերությունների և կինոարտադրողների կողմից, ինչը «Միսս ԱՊՀ»-ի հաղթողին կընձեռի այդ ոլորտում առաջնային դերեր զբաղեցնելու հնարավորություն, · ամրապնդել ԱՊՀ երկրների միջև միջազգային հարաբերությունները մոդելինգի և գեղեցկության ոլորտում:
Մրցույթի մրցանակային ֆոնդը ներառում է` «Միսս ԱՊՀ 2017»-ԱՊՀ լավագույն մոդել կոչումը, նվերներ միջոցառման բազմաթիվ գործընկերների կողմից, ճանաչված և առաջավոր գովազդային գործակալությունների գովազդների նկարահանմանը և նորաձևության ցուցադրություններին մասնակցելու հնարավորություն։
«Միսս ԱՊՀ 2017»-ի եզրափակչի ժյուրիի կազմում կլինի 11 փորձառու մասնագետ։
Ժյուրիի 3 անդամները կլինեն Հայաստանից, 4-ը՝ Ռուսաստանից և 4-ը՝ ԱՊՀ անդամ այլ երկրներից։ Գեղեցկության մրցույթի եզրափակչին հրավիրված կլինեն հայտնի բլոգերներ, նորաձևության հայտնի ամսագրերի խմբագիրներ, նորաձևության քննադատներ, դիզայներներ և հայտնի աստղային դեմքեր։
«Միսս ԱՊՀ 2017»-ի եզրափակչի հյուրերի կազմում կլինեն հայտնի անձինք Ռուսաստանից, Հայաստանից և ԱՊՀ այլ երկրներից, այդ թվում՝ կինոյի և էստրադայի աստղեր, արվեստագետներ և բարձր նորաձևության մասնագետներ:
«Միսս ԱՊՀ 2017» գեղեցկության մրցույթին մրցանակային ֆոնդը 16,2 մլն դրամ է։
Մրցույթի եզրափակիչը կկայանա ԱՊՀ Միջպետական կոմիտեի, Երևանի քաղաքապետարանի և ՀՀ տնտեսական զարգացման և ներդրումների նախարարության աջակցությամբ։
