ԵՐԵՎԱՆ, 2 մայիսի — Sputnik. 1944 թվականին Ղրիմում բռնադատված հայերի ազգականները տեղի համայնք չեն դիմել կեցության վկայական ստանալու համար, Sputnik Արմենիային ասաց հայ համայնքի ղեկավար Վաղարշակ Մելքոնյանը։
Ռուսաստանի նախագահ Վլադիմիր Պուտինը Դաշնային օրենք է ստորագրել «Ռուսաստանի Դաշնությունում օտարերկրյա քաղաքացիների իրավական դրույթների» Դաշնային օրենքի 8-րդ և 9-րդ հոդվածներում փոփոխություններ կատարելու վերաբերյալ, որը 1944 թվականին Ղրիմից արտաքսած ժողովուրդներին, այդ թվում՝ հայերին, պարզեցված կարգով կեցության վկայականի տրամադրում է նախատեսում։
«Տվյալ հրամանը խոսում է ժողովուրդների հոգևոր և մշակութային վերածննդի, նրանց լիարժեք վերականգնման և համապատասխան դաշնային ծրագրի իրականացման մասին։ Ինչ վերաբերում է կոնկրետ հայերին, այսօրվա դրությամբ Ղրիմից արտաքսված ոչ մի հայ (կամ նրանց ազգակցականներից որևէ մեկը) համայնքին նման հարցով չի դիմել»,- ասաց Մելքոնյանը։
Նրա խոսքով` մարդիկ տեղյակ չեն նոր օրենքի մասին, կամ բռնադատվածների ազգակցականներ չեն մնացել, ցրվել են և Ղրիմ վերադառնալու մտադրություն չունեն։
Մելքոնյանը նշեց, որ որպես բռնադատված հայերի, հույների, գերմանացիների և բուլղարների իրավունքների պաշտպանությամբ զբաղվող հասարակական կազմակերպության ղեկավար՝ գիտի, որ գերմանացիների մեջ վերադառնալու ցանկություն ունեն շատերը։
«Շատ են վերադառնալ ցանկացողները գերմանացիների շարքում։ Եթե նրանց տուն կառուցելու համար հողատարածք տրամադրվի՝ կվերադառնան»,- ասաց Մելքոնյանը։
Ինչ վերաբերում է հայ համայնքին, ապա այն պարբերաբար մշակութային միջոցառումներ է անցկացնում, նշում ավանդական տոները։
«Յալթայում չորրորդ անգամ անցկացնելու ենք «Ծովային Հայաստան» փառատոնը։ Այդպես ջենովացիներն անվանում էին Թեոդոսիան. Ղրիմի այդ հատվածում այն ժամանակ շատ հայեր էին բնակվում։ Բացի այդ, մենք ամեն տարի գալա-համերգներ ենք կազմակերպում Սիմֆերոպոլի թատրոններից մեկում»,- ասաց Մելքոնյանը։
Մայիսի 9-ին ուշադրության կենտրոնում է լինելու Ղրիմի ազատագրման համար պայքար մղած Թամանյանական 89-րդ դիվիզիան։
Հայկական համայնքը աջակցում է դպրոցներին, նպաստում հայոց լեզվի և մշակույթի պահպանմանը։
Վերջին պաշտոնական տվյալների համաձայն՝ Ղրիմում բնակվում է շուրջ 12 հազար հայ։ Ոչ պաշտոնական տվյալներով՝ այդ թիվը կազմում է 20 հազար։ Հիմնականում, նրանք բնակվում են քաղաքներում, մասնավորապես` Սիմֆերոպոլում։ Ղրիմում 7 ազգային-մշակութային միություն է գործում, այդ թվում` Յալթայում, Թեոդոսիայում, Կերչում, Սևաստոպոլում։
