ԵՐԵՎԱՆ, 30 ապրիլի — Sputnik. Մայիսի 12-ից 14-ը Հայաստանի մայրաքաղաքում կանցկացվի Golden Lace խորագիրը կրող «Երևանյան նորաձևության շաբաթը», որի բացումը վստահել են հանրահայտ դիզայներ Վյաչեսլավ Զայցևին: Այս մասին Sputnik Արմենիային հայտնեց «Երևանյան նորաձևության շաբաթ» նախագծի կազմակերպիչ, «AFD-International fashion day»-ի հիմնադիր Նաիրա Նիազյանը:
«Ամբողջ աշխարհի դիզայներներին հրավիրում եմ ակտիվ մասնակցության… Երևանյան նորաձևության շաբաթը կբացի Վյաչեսլավ Զայցևը», — ասաց Նիազյանը:
Նա նշեց նաև, որ օրեր առաջ Մոսկվայում անցկացվել է «AFD-International fashion day»-2017 գարնանային ցուցադրությունը:
«Երեխաների, կանանց և տղամարդկանց հագուստի ու աքսեսուարների նոր հավաքածուներ ներկայացրին տարբեր երկրների դիզայներները: Այդ երկրներից շատերում AFD-ն ներկայացուցչություն ունի: «AFD-International fashion day»-ը բացառիկ հարթակ է, fashion-միություն ամբողջ աշխարհի դիզայներների ապրանքանիշները ներկայացնելու համար», — ասաց Նիազյանը:
Գարնանային ցուցադրությանը մասնակցել են նաև հայ դիզայներներ Սվետլանա Հակոբյանը, Ռոմե Հակոբյանը, Պոլինա Գոլուբը, Նարինե Հարությունյանը, Մարինե Բալասանյանը, երգչուհի և դիզայներ Աստղիկ Սաֆարյանը, ինչպես նաև Գայանե Բաղդասարյանը, որը ներկայացրել է Fashion Campus Armenia-ն: Ցուցադրությանը մասնակցել են նաև սկսնակ դիզայներներ: Օրինակ՝ Ժանետ Հովսեփյանը ցուցադրել է «Սև-սպիտակ» հավաքածուն:
Նիազյանը նշեց, որ «AFD-International fashion day»-ը «Follow the Fabrika» նախագծի պաշտոնական գործընկերն է, և այս տարվանից սկսած՝ մասնակիցներից մեկին դրամաշնորհ ստանալու հնարավորություն կընձեռնվի՝ «Follow the Fabrika» նախագծին մասնակցելու համար:
Նախագիծի նպատակն է դիզայներներին դուրս բերել միջազգային շուկա: «AFD»-ն դարձել է նորաձևության աշխարհի ավանդական միջոցառումներից մեկը, որն իր տեղն է զբաղեցրել այդ ոլորտում: Տարեցտարի աճում է ոչ միայն ցուցադրության մասնակիցների քանակը, այլև ընդլայնվում է նրանց աշխարհագրությունը:
