«Փաստ». Ադրբեջան-Հայաստան առևտրաշրջանառությունը նորություն չէ
«Փաստ» օրաթերթը գրում է. «Պարզվում է՝ իշխանությունների համար նորություն չէ հայկական շուկայում ադրբեջանական ապրանք վաճառելու փաստը: 1997-ին Ադրբեջանից Հայաստան է ներմուծվել 62700 դոլարի ապրանք, իսկ մեկ տարի հետո, այդ ցուցանիշը կտրուկ նվազել է` 1500 դոլար:
2003-ին 13400 դոլարի ադրբեջանական ապրանք է ներկրվել: 2004-ին ներմուծվել է 500 դոլարի ապրանք, իսկ հաջորդ տարվանից արդեն նաև արտահանում է իրականացվել:
Վիճվարչության տվյալներով՝ 2005-ին եթե հարևան երկրից 1500 դոլարի ապրանք է ներկրվել, ապա նույն տարում Հայաստանից այնտեղ է ներմուծվել 200 դոլարի ապրանք: 2011-ին ներմուծվել է 8500 դոլարի ապրանք: 2013-ին Հայաստան է ներմուծվել 3800 դոլարի ապրանք:
2016 և 2017 թվականների մասին, վիճվարչության տվյալներով, առևտրաշրջանառություն կրկին չի եղել: Ու եթե անցյալ տարվա մասով ինչ-որ տեղ կարելի է «հավատալ» վիճվարչության կայքում տեղադրված ինֆորմացիային, ապա այս տարվա բացահայտումների ֆոնին նույն աղբյուրի տվյալները բավականին անհանգստացնող են»:
«Փաստ». Վարդան Օսկանյանը ՕՐՕ-ի մասին ասելու բան չունի
«Փաստ» օրաթերթը գրում է. «Վարդանանց փողոցի վրա գտնվող «Օհանյան-Րաֆֆի-Օսկանյան» դաշինքի շտաբը նախկինի պես բազմամարդ չէ:
Ընտրություններից հետո այնտեղ գրեթե չեն լինում նաև դաշինքի անդամ «Համախմբում» ու «Ժառանգություն» կուսակցությունների ներկայացուցիչները»:
ԶԼՄ-ներով լուր տարածվեց, որ հնարավոր է՝ ՕՐՕ-ն փլուզվի: «Համախմբում» կուսակցության նախագահ Վարդան Օսկանյանը երեկ «Փաստի» հարցին, թե, ի վերջո, ի՞նչ որոշվեց ՕՐՕ-ի հետագա ճակատագրի առթիվ, խուսափեց ուղիղ պատասխան տալ: «Բան չունեմ ասելու, հարցազրույց չեմ տալիս»,- ասաց Օսկանյանը:
«Հայկական ժամանակ». Նախարար թե դեսպան
«Հայկական ժամանակ» թերթը գրում է. «Մեր տեղեկություններով՝ Սերժ Սարգսյանը որոշել է բժիշկ, պատգամավոր Արա Բաբլոյանին նշանակել Շվեյցարիայում ՀՀ դեսպան: Անգամ տեղեկացանք, որ արտաքին գործերի նախարարությունն արդեն նրա թեկնածության ագրեմանն ուղարկել է Շվեյցարիա և սպասում է այդ երկրի հաստատմանը:
Ա. Բաբլոյանը, սակայն, մեզ հետ զրույցում հերքեց, որ ինքը Շվեյցարիայում դեսպան է նշանակվելու: «Ո՛չ: Այդպիսի բան չկա, ինձ ոչ նման բան առաջարկվել է, ոչ էլ քննարկվել է այդ հարցը»,- ասաց նա:
Մենք փորձեցինք նաև արտգործնախարարությունից մեկնաբանություն ստանալ այս հարցի շուրջ, բայց մեզ պարզապես չպատասխանեցին: Նշենք, որ դիվանագիտության մեջ ագրեմանն ուղարկելը գաղտնի գործընթաց է, և այդ մասին հրապարակավ չեն հայտնում: Եվ դա հրապարակայնացնում են միայն այն ժամանակ, երբ տվյալ երկիրն ընդունում է առաջարկված թեկնածությունը: Լինում են դեպքեր, իհարկե, հազվադեպ, որ առաջարկված թեկնածությունն ինչ-ինչ պատճառով մերժվում է և նոր թեկնածություն է առաջարկվում: Իսկ ընդհանուր առմամբ, ագրեմանի հաստատումը հատկապես Եվրամիության անդամ երկրներում տևում է մինչև երեք ամիս:
Ինչ վերաբերում է, Ա. Բաբլոյանին, ապա կարծիք կա, որ նա չի ընդունում դեսպան նշանակվելու առաջարկը, ավելի շատ ուզում է առողջապահության նախարար նշանակվել:
Մինչև խորհրդարանական ընտրությունները հրապարակումներ էին լինում, թե առողջապահության նախարար Լևոն Ալթունյանից իշխանության մեջ դժգոհություն կա և մայիսի վերջին ձևավորվող կառավարությունում նա կարող է չլինել: Բա վերջերս վարչապետ Կարեն Կարապետյանը առողջապահության ոլորտի պաշտոնյաների հետ հանդիպման ժամանակ գոհունակություն էր արտահայտել նրանց աշխատանքից, ինչը նշանակում է, որ նա հակված է նրան պահել այդ պաշտոնում:
Իսկ եթե Ա. Բաբլոյանն, իսկապես, Շվեյցարիայում Հայաստանի դեսպան նշանակվի, ապա կհասցնի որոշ ժամանակ պատգամավոր լինել ու անգամ Ազգային ժողովի առաջին նիստը վարել, եթե, իհարկե, «Ծառուկյան» դաշինքից Նապոլեոն Ազիզյանը մանդատ չստանա: ԱԺ առաջին նիստը վարում է տարիքով ամենամեծ պատգամավորը: Արա Բաբլոյանը ծնվել է 1947թ., Նապոլեոն Ազիզյանը՝ 1946թ.:
Այժմ Շվեյցարիայում ՀՀ դեսպանն աշխարհահռչակ ֆրանսահայ երգահան Շարլ Ազնավուրն է»:
«Հրապարակ». ԱԺ նորընտիրները «ոսկու» փնտրտուքների մեջ են
«Հրապարակ» թերթը գրում է. «Պարզվում է` նորընտիրներն ԱԺ-ում ոչ միայն «գոլդ» սենյակների «որոնման» աշխույժ գործընթացների մեջ են, այլև «գոլդ» համարներով ավտոմեքենաների: Հարցը ծառացած է բոլորի, այդ թվում և առաջին անգամ ԱԺ ոտնած գեներալի՝ Քեթրինի Միհրանի առաջ:
Մեր տեղեկություններով` այս պահին ԱԺ-ում «անտեր» են երկու սուպերհամարներով ավտոմեքենաներ` 110.OO11, 200.ՕՕ11։ Կհասնի՞ դրանցից մեկը Միհրան Պողոսյանին, դեռ պարզ չէ. ԱԺ-ում սպասում են աշխատակազմի նոր ղեկավարին, որը, հավանաբար, կլինի Հովհաննես Սահակյանը, և որևէ քայլ այս պահին չեն պատրաստվում անել:
Ի դեպ, սենյակային «գոլդ» որոշումների մեջ է նաև առաջին անգամ պառլամենտ ոտնած Վարդան Ղուկասյանը: Նա պահանջել է իրեն տրամադրել Վարդան Օսկանյանի` ԱԺ դահլիճին կից, երկու սենյակից բաղկացած «ապարտամենտը», որը, կարծես, նրան չեն տրամադրի: Այն «նախատեսվել» է Արմավիրում ՀՅԴ ռեյտինգային ցուցակով ընտրված Անդրանիկ Կարապետյանի համար, որն, ըստ մեր աղբյուրների, գեներալ Մանվելի սանիկն է»:
«Ժամանակ». Կոստանյանը՝ նախարա՞ր
«Ժամանակ» թերթը գրում է. «Արդարադատության նախարարությունում համառորեն լուրեր են շրջում, թե նախկին գլխավոր դատախազ Գևորգ կոստանյանը կարող է դառնալ արդարադատության նախարար:
Հաշվի առնելով Կոստանյանի գիտելիքները, անգլերենի իմացությունը, նաև ՄԻԵԴ-ում երկար տարիների աշխատանքը և այն ծավալի աշխատանքները, որ առաջիկայում սպասվում են արդարադատության նախարարություն-Ազգային ժողով համակարգում, չի բացառվում, որ այդ լուրերն իրականության հող ունենան:
Այդ դեպքում՝, համոզված կարող ենք ասել, որ արդարադատության նախարար Արփինե Հովհաննիսյանը կվերցնի ԱԺ մանդատը և, անխոս, կզբաղեցնի ԱԺ փոխնախագահի պաշտոնը»:
