ԵՐԵՎԱՆ, 29 ապրիլի — Sputnik, Անի Դավթյան. 80 հա կանաչ տարածք, որը ոչ քաղաքացիներին է ծառայում, ոչ գիտությանը: Խոսքը բուսաբանական այգու մասին է:
Այսօր այգին ի վիճակի չէ պատշաճ իրականացնել հանգստի գոտու և էկոտարածքի գործառույթները, ֆինանսական միջոցներ չկան, այգին օր օրի վերանում է: Տարածքի մեծ մասն արդեն վերածվել է աղբանոցի, իսկ ամռանն անտանելի է դառնում գետից եկող գարշահոտը։
Այգու հարակից շենքերից մեկի բնակիչ Էդգար Գուշչյանը, չնայած այգու անմխիթար վիճակին, շատ է սիրում լինել այնտեղ։ Նրա խոսքով՝ լավ տեղ է ընկերների հետ քայլելու ու ժամանակ անցկացնելու համար, բայց խանգարող հանգամանքներ շատ կան։
«Չնայած գեղեցիկ լինելուն`այգին խնամված չի, կան գործեր,որոնք չեն արվում, օրինակ՝ ծառերը էտելը, տարածքը մաքրելը, սանիտարական աշխատանք չի տարվում։ Այգու միջից, եթե տեսել եք, կոյուղի է անցնում, որը հարակից շենքերից և հեռավոր Քանաքեռից է գալիս, շատ տհաճ հոտ է, նամանավանդ՝ գիշերային ժամերին կոյուղու հոտը ճնշում է ժողովրդին, և սա է պատճառը, որ ավելի քիչ են այցելում այգի»,- ասաց Գուշչյանը։
Հասարակական մի շարք կազմակերպություններ, միանալով «Նորից Հայաստանը մաքուր դարձնենք» նախաձեռնության հայտարարած համահայկական շաբաթօրյակին, կամավորների մասնակցությամբ այսօր մաքրել են Երևանի՝ դեռ պահպանված այս եզակի կանաչ տարածքը:
«Երիտասարդ կենսաբանների ասոցիացիա» ՀԿ համակարգող Նարեկ Ադամյանը Sputnik Արմենիային ասաց, որ ծրագրին մասնակցել է շուրջ 200 կամավոր։
«Երիտասարդ կենսաբանների ասոցիացիան տարբեր տարածքներում արդեն իրականացրել է աղբահանություն. Սևանի ազգային պարկում, Գոշ լճում, այս անգամ էլ որոշեցինք կենտրոնանալ Երևանի և հենց Բուսաբանական այգու վրա։ Այն մեզ համար թիրախային տարածք է»,- ասաց նա։
Այգու մաքրությունը պահպանելու համար երիտասարդ կենսաբանները պատրաստվում են տարածքում նոր աղբամաններ տեղադրել և ստեղծել հանգստի գոտիներ։
Այգին պատկանում է Գիտությունների ազգային ակադեմիայի բուսաբանության ինստիտուտին: Ֆինանսների սղության պատճառով այն պատշաճ ուշադրության չի արժանանում։ Բուսաբանական այգին հիմնվել է 1935 թ.-ին՝ 120 հա տարածքի վրա, որից այսօր օգտագործվում է միայն 80-ը:
Անցյալում ծաղկուն և ամենաբազմազան բույսերով հարուստ Բուսաբանական այգին, հիմնադիրների համոզմամբ, պետք է կատարեր մայրաքաղաքի թոքերի դերը, սակայն հիմնադրման օրից 82 տարի անց այստեղ համատարած աղբ ու հրդեհված տարածքներ են:
