ԵՐԵՎԱՆ, 26 ապրիլի — Sputnik. 2007 թվականին ապրիլի 26-ը պաշտոնապես հայտարարվեց Հայաստանի սահմանապահի օր։ Այդ մասին համապատասխան հրաման ստորագրեց երկրի նախագահը։
1994 թվականի ապրիլի 26-ին ներկայացվեց «Պետական սահմանի մասին» օրենքի նախագիծը. տոնը նվիրված է հենց այդ իրադարձությանը։ Պետական սահմանի պաշտպանությունը ՀՀ ազգային անվտանգության ապահովման համակարգի անբաժան մասն է և ներառում է քաղաքական, իրավական, տնտեսական, ռազմական, տեխնիկական և այլ միջոցառումներ, որոնք երաշխավորում են պետական սահմանի անձեռնմխելիությունը։
Սահմանապահների գործառույթների մեջ են մտնում նաև իրավաբանական և ֆիզիկական անձանց կողմից պետական սահմանի, սահմանային և պետական սահմանով հսկիչ-անցակետային ռեժիմի պահպանումը։ Բացի այդ, հենց սահմանապահներն են ապահովում պետական սահմանն արտաքին և ներքին վտանգներից։
Հայկական սահմանապահ զորքերը մտնում են ազգային անվտանգության ծառայության համակարգի մեջ, իսկ հարավային սահմանների պաշտպանությունն իրականացվում է ռուս գործընկերների հետ համատեղ։ Ի սկզբանե Հայաստանի սահմանապահ զորքերը մտնում էին ՀՀ ԶՈՒ կազմի մեջ, սակայն 2004 թվականին նրանք փոխանցվեցին ազգային անվտանգության նախարարությանը։ Հայաստանը սահմանակից է չորս պետությունների հետ. հյուսիսից՝ Վրաստանի, Ադրբեջանի հետ՝ հյուսիս-արևելքից, Իրանի հետ՝ հարավ-արևմուտքից և Թուրքիայի հետ՝ արևմուտքում և հարավ-արևմուտքում, արևելքում` Արցախի հետ։ Սակայն արցախյան հակամարտության պատճառով Ադրբեջանի հետ սահմանները պահպանում են բանակային ստորաբաժանումները։
Հայ սահմանապահները պահպանում են Վրաստանի և Իրանի հետ սահմանները։ Թուրքական սահմանը, պայմանագրերի համաձայն, պահպանում են ռուս սահմանապահները։
