ԵՐԵՎԱՆ, 26 ապրիլի — Sputnik. Չեխիայի Խորհրդարանը երեկ երեկոյան ընդունել է Հայոց ցեղասպանությունը դատապարտող թիվ 414 բանաձեւը։ Քվեարկությանը մասնակցել է 107 պատգամավոր, որից 104-ը կողմ է քվեարկել, 3-ը՝ ձեռնպահ։ Չեխիայում Հայաստանի արտակարգ և լիազոր դեսպան Տիգրան Սեյրանյանը Sputnik Արմենիային մանրամասնեց, որ բանաձևում նշվում են Երկրորդ աշխարհամարտի տարիներին հրեաների, գնչուների և սլավոնների նկատմամբ ցեղասպանությունը, Առաջին աշխարհամարտի տարիներին՝ հայերի և այլ ազգային ու կրոնական փոքրամասնությունների ցեղասպանությունները Օսմանյան կայսրությունում, ինչպես նաև այլ ցեղասպանություններն ու մարդկության դեմ հանցագործությունները:
«Տարիներ շարունակ աշխատանք է տարվել այդ ուղղությամբ, ընդ որում, Պրահայի և ամբողջ Չեխիայի հայ համայնքն ակտիվ գործունեություն է ցուցաբերել բանաձևն ընդունելու համար։ Դա նաև չեխ ժողովրդի՝ հայերի հանդեպ բարյացկամ վերաբերմունքի դրսևորում է»,- ասաց Տիգրան Սեյրանյանը։
Նա նշեց, որ Չեխիայի նախագահ Միլոշ Զեմանը նույնպես հայանպաստ քաղաքականություն է վարում և ցանկացավ Sputnik Արմենիայի միջոցով երախտագիտություն հայտնել նախագահին, չեխ ժողովրդին և Չեխիայի հայերին։
Հայ դիվանագետներին աջակցում են Պրահայի հայ երիտասարդները, որոնք օգնում են հայապահպանության գործում։ Տիգրան Սեյրանյանի խոսքով՝ Չեխիայի հայ համայնքը ամրապնդվել է հիմնականում հետխորհրդային շրջանում, և հայերն ակտիվ մասնակցում են դեսպանատան միջոցառումներին, ինչպես նաև հանդես են գալիս սեփական նախաձեռնություններով։
