ԵՐԵՎԱՆ, 26 ապրիլի — Sputnik. Հայաստանը ողջունում է Չեխիայի խորհրդարանի պատգամավորների պալատի կողմից Հայոց ցեղասպանության և մարդկության դեմ գործած այլ հանցագործությունները ճանաչող և դատապարտող բանաձևի ընդունումը։ Այս մասին հայտարարություն է տարածել Հայաստանի արտործնախարար Էդվարդ Նալբանդյանը:
«Չեխիայի պատգամավորների պալատի բանաձևը՝ երկրի նախագահ Միլոշ Զեմանի՝ Հայոց ցեղասպանությունը դատապարտող հայտարարությունների հետ միասին, հանդիսանում են Չեխիայի Հանրապետության արժեքավոր ներդրումը ցեղասպանությունների և մարդկության դեմ հանցագործությունների կանխարգելման վեհ գործում»,-ասված է Նալբանդյանի հայտարարությունում:
Չեխիայի խորհրդարանի պատգամավորների պալատը Հայոց ցեղասպանությունը դատապարտող բանաձևն ընդունել է երեկ` ապրիլի 25-ին։ Բանաձևին կողմ է քվեարկել 104 պատգամավոր։
Պատգամավորների պալատի անդամները դատապարտել են Հայոց ցեղասպանությունը՝ այն մարդկության դեմ հանցագործություն որակելով։
