ԵՐԵՎԱՆ, 20 ապրիլի — Sputnik. Ռուս ռեժիսոր Ռադմիր Շայխուտդինովը յուրօրինակ ներկայացում-համերգ է բեմադրել հայտնի կոմպոզիտոր Միքայել Թարիվերդիևի ստեղծագործությունների հիման վրա, որում փորձել է նոր մոտեցում ցուցաբերել վարպետի դասական ստեղծագործությունների նկատմամբ, ինչպես նաև այն գործերի, որոնք հեղինակի կյանքի օրոք բավական ավանգարդ էին համարվում, գրում է «Մոսկովսկի կոմսոմոլեց» թերթը։
Քչերին է հայտնի, որ բացի «Գարնան տասնյոթ ակնթարթ», «Ճակատագրի հեգնանքը կամ բաղնիքդ անուշ» և այլ ֆիլմերի հայտնի երաժշտությունից, կոմպոզիտորը ստեղծում էր նաև փորձառական գործեր, ինչպես օրինակ «Այնպիսի աչքեր ունես» կոմպոզիցիան, որը երգում էր Մայա Կրիստալինսկայան, կամ Գրիգորի Պոժենյանի բանաստեղծությունների հիման վրա գրված վոկալային շարքը, գրում է պարբերականը։
Ռեժիսորի կարծիքով, Թարիվերդիևը դարձավ Մեծ Բրիտանիայում 1990-ականներին պաշտոնապես հայտնված նոր ժանրի սկիզբ դնողը։ «Այնպիսի աչքեր ունես» երգը, որը գրվել է 1960-ականներին, հենց այսօր է հասարակության և ժամանակակից երաժիշտների մոտ հետաքրքրություն առաջացնում, որոնցից շատերը նույնիսկ ռեմիքսներ են անում դրանով։
«Որքան էլ զարմանալի չէ, կարծում եմ, նրանից է սկսել ռուսական երաժշտության մեջ տրիպ-խոպ ուղղության զարգացումն՝ անկախ նրանից, որ նման ոճ այն տարիներին դեռ գոյություն չուներ, և Մեծ Բրիտանիայում այն առաջացել է միայն 90-ականներին։ Ստացվում է, որ մեր երկրում Թարիվերդիևը կանխագուշակել է երաժշտության ապագան։ Մենք հրավիրել ենք կատարելու այդ ստեղծագործությունը հենց Յուլիա Բուժիլովային, քանի որ ես հասկանում էի, որ նրան կհաջողվի անել դա շատ նուրբ, հստակ և նորովի»,- ասաց Շայխուտդինովը։
Նա պատմել է, որ փնտրում էր ուղեկցորդների, դերասանների, որոնք կկարողանան ներկայացնել Միքայել Լեոնովիչին արդիական կատարմամբ։
«Բոլոր ստեղծագործությունները հնչում էին նորովի, այլ հարց է, որ հանդիսատեսի շրջանում ավագ սերնդի ներկայացուցիչներ կային և հավանաբար, նրանցից բոլորը չէ, որ պատրաստ էին փորձարկումների՝ ի տարբերություն երիտասարդ լսարանի, որին ավելի հետաքրքիր էր նման փորձը։ Բեմում և դահլիճում տեղի ունեցավ անցյալի և ներկայի բախում։ Ինձ՝ որպես ռեժիսորի, հետաքրքիր էր հետևել այդ ամենին»,- խոստովանեց ռեժիսորը։
