ԵՐԵՎԱՆ, 21 ապրիլի — Sputnik. Ֆրանսիացի Մաքսիմ Վաշյե Լագրավի նկատմամբ երրորդ տուրում հաղթանակ տանելուց հետո, Արոնյանը ոչ մի շանս չտվեց նաև հաջորդ պարտիաներով՝ ստիպելով հանձնվել համապատասխանաբար գերմանացի Մաթիաս Բլուբաումին և Ադրբեջանը ներկայացնող Արկադի Նայդիշին:
Շախմատի Հայաստանի առաջատարը վաղուց է՝ ինչ չէր կարողանում իր կայուն ելույթներով ուրախացնել երկրպագուներին: Սակայն GRENKE Chess Classic մրցաշարում Արոնյանի խաղը նորից վերելք է ապրում ու արդյունքն ակնհայտ է: Ընդ որում, հայ շախմատիստը աշխարհի չեմպիոն Մագնուս Կառլսենի հետ միավորը կիսելուց հետո սկսեց ավելի ագրեսիվ խաղ ցուցադրել:
Հինգերորդ տուրում Արկադի Նայդիշի հետ պարտիայում արդեն խաղասկզբում Արոնյանը առավելություն ստացավ ու այլևս բաց չթողեց նյութական ու դիրքային առավելությունը՝ պարտիան հասցնելով նպատակային հաղթանակին:
Մրցաշարի ավարտից երկու տուր առաջ Լևոն Արոնյանն արդեն մեկ միավորի առավելություն ունի երկրորդ տեղում ընթացող չինուհի Հու Յիֆանի նկատմամբ: Դա նշանակում է, որ առաջին տեղը ապահովելու համար առաջիկա երկու պարտիաներում հայ շախմատիստին հարկավոր է վաստակել ընդամենը կես միավոր:
Այսօր Արոնյանը սպիտակ խաղաքարերով մրցելու է հենց Հու Յիֆանի հետ, իսկ վերջին տուրում մեր գրոսմայստերն արդեն սև խաղաքարերով խաղալու է Ֆաբիանո Կարուանայի հետ:
