ԵՐԵՎԱՆ, 21 ապրիլի — Sputnik. Վաշինգտոնում Հայոց ցեղասպանության թանգարանի համար նախատեսված շենքը վաճառվել է 57 միլիոն դոլարով։ Այսօր` ապրիլի 21-ին, կայացած ասուլիսի ժամանակ Հայոց ցեղասպանության թանգարան-ինստիտուտի տնօրեն Հայկ Դեմոյանը հայտարարեց, որ սա ավելի քան տխուր լուր է։
«Սա ավելին է, քան տխուր լուր, ինչպես կարելի է 12-15 տարի շարունակ խոսել մի ծրագրի մասին, որը համազգային հիշողության, պատմության կարևորագույն դրվագ է, ունի ռազմավարական նշանակություն, գտնվում է ԱՄՆ-ի մայրաքաղաքի կենտրոնում և այդքան ռեսուրսներ, ներուժ ներդնելով այս ծրագրի մեջ՝ այն հետագայում վերածվեց դատական գործընթացի, որտեղ միլիոնավոր դոլարներ ուղղակի փոշիացվեցին` փոխադարձ մեղադրանքների և դատաքննությունների արդյունքում: Ի վերջո, տեսանք, որ դատաքննության հաղթող կողմը որոշեց, որ հարմար չի գտնում Հայոց ցեղասպանության թանգարանի կառուցումը և շենքը վաճառվեց»,-ասաց Դեմոյանը:
Նա ցավալի համարեց այն, որ ոչ ոք չքննադատեց այդ փաստը, այնինչ գոնե համայնքային արձագանք էր պետք:
