ԵՐԵՎԱՆ, 20 ապրիլի — Sputnik, Լաուրա Սարգսյան. Հայաստանի քաղաքացիները, վերջապես, կկարողանան Իսրայել մեկնել ուղիղ չվերթով, առանց ավելորդ գլխացավանքի։ Հայաստանի և Իսրայելի միջև ուղիղ ավիահաղորդակցման կարգավորման նախագծի իրականացման հարցում մեծ ներդրում է ունեցել Հայաստանի Քաղավիացիայի գլխավոր վարչությունը։
«Սա երկար սպասված չվերթ էր։ Վերջին չվերթը Իսրայելից Հայաստան իրականացվել է 2015 թվականի վերջին՝ իսրայելական ավիաընկերության կողմից», — Sputnik Արմենիայի թղթակցի հետ զրույցում ասաց Քաղավիացիայի գլխավոր վարչության օդային փոխադրումների կարգավորման վարչության պետ Աննա Չոբանյանը։
Քաղավիացիայի գլխավոր վարչության կարևոր ձեռքբերումն այն է, որ իսրայելական կողմի հետ բազմաթիվ բանակցություններից հետո վարչությունը կարողացել է, վերջապես, դեպի Իսրայել տեղի ավիաընկերության կողմից թռիչքների իրականացման համար թույլտվություն ստանալ։
Չոբանյանը նշանակալի է համարում ուղիղ չվերթերի բացումը այն երկրների հետ, որոնց հետ Հայաստանն ավիահաղորդակցություն չունի։ Դա կնպաստի ոչ միայն զբոսաշրջության զարգացմանը, այլև տնտեսական և մշակութային կապերի ամրապնդմանը։ Նշանակում է, որ «Armenia»-ն դանդաղ, բայց հաստատուն քայլերով առաջ է գնում։
Հայաստանն այսօր հնարավորություն ունի չվերթեր իրականացնել ԵՄ բոլոր երկրներ, դրա համար անհրաժեշտ իրավաբանական հիմքը լիովին պատրաստ է։ Այդպիսով, եվրոպական ավիաշուկա դուրս գալու առանձնակի խոչընդոտներ չկան, ամեն ինչ կախված է ավիաընկերության որոշումից և հնարավորություններից։
«Մի քանի օր հետո տեղի կունենա Հայաստանի և ԵՄ բանակցությունների առաջին փուլը Հայաստանը Եվրոպայի միասնական ավիաշուկայում ներառելու մասին»,- ասաց Չոբանյանը։
Նրա խոսքով` դա թույլ կտա ընդլայնել Հայաստանի հնարավորությունները ԵՄ երկրներում։
Եվրոպական միասնական ավիատարածությանը (European Common Aviation Area (ECAA) Հայաստանի միացումը հայկական ավիաընկերությունների առջև լայն հնարավորություններ կբացի։ Նրանք կկարողանան չվերթեր իրականացնել Եվրոպական միասնական ավիատարածության ցանկացած երկիր։
Հայկական երկնքի ազատականացման մասին 2013 թվականին ընդունված որոշումը պետք է առողջ մրցակցություն ստեղծի և առաջարկվող ծառայությունների արժեքի նվազեցման բերի` մեծացնելով ուղևորահոսքը։ Հայաստանն արդեն ազատականացրել է օդային հաղորդակցությունը 14 երկրի հետ, մասնավորապես` Ռուսաստանի, Ավստրիայի, Իրանի, Իսպանիայի, Քաթարի և Շվեյցարիայի հետ։
«Armenia» ավիաընկերության հիմնադիրներն են Աշոտ Թորոսյանը (51 տոկոս բաժնետոմսեր), Թամազ Գաիաշվիլին (24 տոկոս) և Ռոբերտ Օգանեսյանը (25 տոկոս): Հայաստանը զրկվեց ազգային ավիափոխադրողից 2013 թվականին, «Արմավիա» ընկերության սնանկացումից հետո: Հայաստանի ավիաշուկայում հայտնվեց Air Armenia ընկերությունը, որը, սակայն, 2014 թվականի հոկտեմբերին սնանկացավ ու դադարեցրեց ավիափոխադրումները:
