ԵՐԵՎԱՆ, 18 ապրիլի — Sputnik. Հայ հանդիսատեսը փաստացի երկու ճամբարի բաժանվեց։ Ոմանք Սպենդիարյանի անվան օպերայի և բալետի ազգային ակադեմիական թատրոնում ռեստորանի բացումը այլանդակություն են համարում, մյուսները` այդ թվում ՀՀ մշակույթի նախարար Արմեն Ամիրյանը, ընդգծում են, որ դա թույլ կտա նոր մշակույթ ձևավորել։ Լրագրողների մի մասը նույնպես չի ողջունում այդ նախաձեռնությունը։
«Ինչո՞ւ եք դուք ամեն ինչ ընկալում ձեր երևակայության տեսանկյունից։ Արդյո՞ք դուք եղել եք աշխարհի օպերային թատրոններում, օրինակ, Մետրոպոլիտեն օպերայում։ Այդ շենքերում էլ կան ռեստորաններ և այդտեղ ձևավորված է այդ մշակույթը, որը մենք ցանկանում ենք բերել մեր հասարակություն»,- ասաց Ամիրյանը։
Նա ընդգծեց, որ նախարարությունը ծրագրածն իրականացնելու է։ Ամիրյանը կոչ է արել հասարակությանը՝ փոխել վերաբերմունքը նախագծի նկատմամբ և այն դիտարկել շենքի համատեքստում, այլ ոչ որպես առանձին վերցրած օբյեկտ։ Մշակույթի նախարարը վստահություն հայտնեց, որ նախագիծն ուղղված է դեպի թատրոն մեծ լսարանին ներգրավելուն և թույլ կտա մշակույթը նոր մակարդակի բարձրացնել։
«Սա սովորական ռեստորաններին չի նմանվելու։ Հայ հասարակությունը կկարողանա իր հանգիստն անցկացնել գեղեցիկ միջավայրում»,- ասաց Ամիրյանը։
Օպերային թատրոնի վերածնունդը Ամիրյանը կապում է նոր գեղարվեստական ղեկավար Կոնստանտին Օրբելյանի հետ։
Օպերային թատրոնը վիրտուալ դեկորացիաներ է ձեռք բերել, օպերայում կարծում են, որ մոտ հեռանկարում թատրոնը կհասնի բարձր մակարդակի և կդառնա մշակութային կենտրոն ոչ միայն հայ հանդիսատեսի համար, այլև արտասահմանյան հյուրերի։
