ԵՐԵՎԱՆ, 10 մարտի — Sputnik. Ալեքսանդր Սպենդիարյանի անվան օպերայի և բալետի ազգային ակադեմիական թատրոնի գեղարվեստական ղեկավար Կոնստանտին Օրբելյանը շրջայց կատարեց թատրոնի բազմահարկ շենքում։
«Մենք պետք է ավելի շատ ուշադրություն դարձնենք մշակութային իրադարձություններին, ներկայացնենք մեր երկիրը։ Գաղտնիք չէ, որ հայ արտիստներին գիտի ամբողջ աշխարհը», — լրագրողների հետ հանդիպմանն ասաց Օրբելյանը` կոչ անելով նրանց ավելի ակտիվ լուսաբանել երկրի մշակութային կյանքը։
Մաեստրոն պատմեց լրագրողներին թատերական շրջանի ծրագրերի մասին։ Ապրիլի ամենավառ իրադարձություններից մեկը կլինի Ջուզեպպե Վերդիի «Ռեքվիեմի» պրեմիերան։ Այդ հարցում Օրբելյանին օգնում է նրա ընկերը` իտալացի բեմադրող Պաոլո Միչիկեն, որը վիզուալ անակնկալներ է պատրաստում Սիքստինյան մատուռի որմնանկարների և նկարների տեսքով։ Նախատեսվում է բեմադրել նաև «Կախարդական սրինգ», «Սևիլյան սափրիչ», «Սիրային ըմպելիք» օպերաները։
Օրբելյանը հայտնեց նաև, որ պատրաստվում են համագործակցել աշխարհի մյուս օպերային թատրոնների հետ։ Արդեն պայմանավորվածություն կա Լիտվայի օպերայի և բալետի թատրոնի հետ, որի հետ համատեղ բեմադրելու են Պյոտր Չայկովսկու «Եվգենի Օնեգին», Ռիխարդ Վագների «Լոենգրին» և Ջուզեպպե Վերդիի «Էրնանի» օպերաները։ Թատերախումբը կմասնակցի նաև Տորե դել Լագոյում կայանալիք «Պուչինի» փառատոնին։
Օրբելյանը հավաստիացրեց, որ առաջիկայում ակադեմիական թատրոնն ամենաբարձր մակարդակի կհասնի և այն մշակույթի կենտրոն կդառնա ոչ միայն հայ հանդիսատեսի, այլ նաև արտասահմանյան հյուրերի համար։ Նշենք, որ հրավիրված հյուրերի շարքում էր նաև Sputnik Արմենիայի գլխավոր խմբագիր Ալինա Օրդյանը։
