ԵՐԵՎԱՆ, 14 ապրիլի — Sputnik. ՀՀ առողջապահության նախարար Լևոն Ալթունյանի կարծիքով` բժիշկների և հասարակության միջև կա վստահության կորուստ։
«Այդ է պատճառը, որ այսօր լավագույն ուսանողներն ու լավագույն երիտասարդ բժիշկներն անգլերեն, գերմաներեն են ուսումնասիրում, որպեսզի աշխատանք գտնեն արտասահմանում։ Հասարակությունը չի հավատում, որ բժիշկը կտա այն ամենը, ինչ նա սպասում է բժշկից, բժիշկն էլ չի հավատում, որ հասարակությունը պատրաստ է իրեն տալ բարեկեցություն և ընտանիքին ֆինանսական ու այլ տիպի կայունություն»,-ասաց նախարարը։
Նախարարի խոսքով` այս երկկողմ վստահությունն է պետք վերականգնել։
«Բժիշկը չպետք է ամեն անգամ ապացուցի, որ ինքը փիղ չէ»,- ասաց Ալթունյանը։
Նախարարն ավելացրեց, որ Հայաստանում կան շատ լավ բժիշկներ, որոնց դռների առաջ հերթեր են գոյանում, որոնց վստահում են, իսկ կատարած բուժումները ցանկալի արդյունք են տալիս։
