ԵՐԵՎԱՆ, 14 ապրիլի — Sputnik. Մեկ ժպիտ, որը կնվազեցնի կոռուպցիոն ռիսկերը։ Առողջապահության նախարար Լևոն Ալթունյանն առաջարկում է ժպիտով հարթել բժշկի հետ հարաբերությունները։
«Ոչ մի երկրում պետպատվերով սպասարկող բժիշկն առանձնապես երջանիկ չէ։ Փորձեք ժպտալ բժշկին, գուցե ստացվի փոխադարձաբար ժպիտ ստանալ»,-ասաց նախարարը։
Նախարարի խոսքով` աշխարհի որ երկրում էլ լինես, պետպատվերով կամ պետական բազային ապահովագրական ծրագրերով սպասարկվող անձինք հերթեր են կանգնում, սպասում են ամիսներով, որպեսզի պետական ապահովագրության կամ պետական պատվերի շրջանակում բժշկական օգնություն ստանան։
«Դա փաստ է, և դրա դեմ ոչ մի բան հնարավոր չէ անել տվյալ դեպքում, որովհետև պետպատվերը պլանային տնտեսվարման բաղադրիչներից մեկն է, իսկ պլանային տնտեսվարումը չի նախատեսում ինդիվիդուալ մոտեցումներ։ Մենք մեր պլաններում նախատեսում ենք, որպեսզի պլանային ապահովագրության կամ պետպատվերի շրջանակում մենք չսպասեցնենք մեր քաղաքացիներին և չվատթարացնենք հնարավոր սպասելիքները, այն է` բուժման արդյունքները»,- ասաց Ալթունյանը։
Բայց դրա հետ մեկտեղ նախարարը հորդորում է հասկանալ, որ պետպատվեր տրամադրելու համար հաշվարկվում են ամենանորմատիվային ժամկետներն ու ամենաբյուջետային դեղորայքը։
Նախարարն ավելացրեց նաև, որ իրենց համար ամենասուր հարցերից մեկը պետպատվերի ծավալների շուտ սպառվելն է։ Այդ դեպքում ոլորտի պատասխանատուներն ընկնում են ցայտնոտի մեջ հասկանալու համար` որտեղ տնտեսում անեն պետական ծրագրերը մինչև վերջ տանելու համար։
