ԵՐԵՎԱՆ, 13 ապրիլի — Sputnik. Երևանից 35 կմ հեռավորության վրա գտնվող Ակնալիճ գյուղում կկառուցվի եզդիների` աշխարհում ամենամեծ տաճարը, գրում է LaCroix առցանց պարբերականը:
Եզդիների ամենամեծ համայնքը, գրում է պարբերականը, ապրում է Իրաքի տարածքում, որտեղ անդադար ենթարկվում է ջիհադականների հարձակումներին: Հենց այդ պատճառով էլ եզդիները, որպես կրոնական փոքրամասնություն, հուսով են, որ տաճարը կդառնա հզորության և ուժի խորհրդանիշ, որը թույլ կտա պահպանելու բացառիկ կրոնը:
«Եզդիները հին կրոնի` զրադաշտության, հետևորդներ են: Հայաստանում, այսօրվա դրությամբ, շուրջ 35000 եզդի է բնակվում, և նրանք միայն մեկ փոքր տաճար ունեն կովկասյան այդ երկրում»,- գրված է հոդվածում:
Տաճարը կկառուցվի Ակնալճում ծնված հայտնի մոսկվայաբնակ գործարար Միրզա Սլոյանի աջակցությամբ: Տաճարը կստանա QubaMereDiwane անվանումը:
Պարբերականի տվյալներով` Ակնալիճ գյուղում մոտ 150 եզդի է ապրում: 25-մետրանոց տաճարը կառուցվում է մարմարից և գրանիտից, այնտեղ կլինի աղոթասրահ, կգործի կրոնական դպրոց, թանգարան կբացվի:
«Սինջարում մենք կորուստներ ունեցանք և ծայրահեղ ճնշված ենք: Այս տաճարը մեզ վերածնվելու հույս է տալիս»,- պարբերականի հետ զրույցում ասաց Հայաստանի եզդիների հոգևոր առաջնորդ Հասան Հասանյանը:
Նա նշեց, որ եթե այսօր հնարավորություն կա նման շքեղ տաճար կառուցելու, ապա դա նշանակում է, որ եզդիները «անցան փորձությունը և չհանձնվեցին»:
Դեռևս ԽՍՀՄ տարիներից եզդիների համայնքը ինտեգրվել է հայ հասարակության մեջ, ազատ դավանում է իր կրոնն ու թերթեր և դասագրքեր հրատարակում եզդիերեն:
Հայաստանի եզդիների հոգևոր առաջնորդ Հասայանը նշեց, որ եզդիները պետություն չունեն, և լինելով խոցելի փոքրամասնություն, նրանք վտանգված են ձուլվելու, եթե դադարեն պաշտպանել իրենց ավանդույթները:
Նա հույս հայտնեց, որ տաճարը, ինչպես սպասվում է, կբացվի այս տարի և «կդառնա հոգևոր կյանքի խոշորագույն կենտրոն ամբողջ աշխարհից եկող եզդի ուխտագնացների համար»:
