ԵՐԵՎԱՆ, 3 օգոստոսի- Sputnik. Մարդկությունը պետք է պայքարի անմեղ մարդկանց սպանող ահաբեկիչների դեմ, երեքշաբթի լրագրողներին ասաց Աշխարհի և Հայաստանի եզդիների միության նախագահ Ազիզ Թամոյանը։ Նրա խոսքով` Շանգալի իրադարձությունների զոհերին այսօր հարգանքի տուրք են մատուցում ոչ միայն Հայաստանում, այլև` ողջ աշխարհում։ Եզդիներն իրենց բողոքի ակցիաներով հիշեցնում են «Իսլամական պետություն» ահաբեկչական կազմակերպության հրեշավոր արարքը։
«Մենք այսօր հիշում և դատապարտում ենք այդ մարդանման բարբարոսներին։ Մարդկությունը պետք է սկսի ազատվել ահաբեկիչներից, որոնք ոչնչացնում են խաղաղ մարդկանց` հայերին, եզդիներին, ասորիներին և այլ ազգերի ներկայացուցիչներին»,- ասաց Թամոյանը։
Նա ընդգծեց, որ ապագայում նման հանցագործությունների կրկնությունը կանխելու համար պետք է այսօր աչք չփակել այդօրինակ վայրագությունների վրա։
Փաստաբան Հասան Թամոյանն իր հերթին նշեց, որ շնորհակալ է հայ ժողովրդին եզդիներին մշտապես աջակցելու համար։
«Հայաստանի նախագահը միակ առաջնորդն է, որը հանդես է եկել եզդի ժողովրդին աջակցելու և օգնելու հայտարարությամբ»,- ասաց Թամոյանը։
Փաստաբանը նշեց, որ այդ ցեղասպանությունից հետո եզդիները ցրվել են աշխարհով մեկ։ Ոմանք խեղդվել են Միջերկրական ծովում` չհասնելով ափին, մյուսներն անմարդկային պայմաններում ապրում են տարբեր երկրների ճամբարներում։
Սպանվել է ավելի քան 10 հազար մարդ, շուրջ 5000 հազար կանանց և երեխաների ստրկության են վերցրել, ավելի քան 400 հազար եզդի փախստական է դարձել։ Պատմության մեջ առաջին անգամ եզդիները լքել են այն տարածքները, որտեղ բնակվել են դարեր շարունակ։
