ԵՐԵՎԱՆ, 11 ապրիլի — Sputnik. Հայ ծանրամարտիկների թիմը լիովին օգտագործեց իր հնարավորությունները, ասաց Հայաստանի ծանրամարտի տղամարդկանց հավաքականի գլխավոր մարզիչ և ֆեդերացիայի գլխավոր քարտուղար Փաշիկ Ալավերդյանը։
«Աղջիկները ելույթ ունեցան 70%-ով։ Տղաներն իրենց շատ լավ դրսևորեցին։ Օլիմպիական խաղերից հետո նրանք երկար ժամանակ մրցումների չէին մասնակցել, բայց կարճ ժամանակում կարողացան վերադառնալ լավ մարզավիճակի։ Դա առավելագույնն էր, տվյալ պահին ավելին հասնել մենք չէինք կարող»,- ասաց Ալավերդյանը։
Նրա խոսքով՝ սպասվածից ավելի լավ ելույթ ունեցավ Անդրանիկ Կարապետյանը։ Նրա համար շատ կարևոր էր սեփական ուժերին հավատալ։
Ալավերդյանը նշեց, որ այս տարի փնտրտուքների շրջան է. պետք է հասկանալ նորեկներից ով կմասնակցի առաջիկա աշխարհի առաջնությանն ու Օլիմպիադային։
Հավաքականը կանցկացնի մարզումային հավաքներն ու աշխարհի առաջնությանը կպատրաստվի Ուկրաինայում, Ռուսաստանում և Հայաստանում։ Եթե ֆինանսական հնարավորությունները թույլ տան՝ հավաքներ կանցկացվեն նաև ԱՄՆ-ում։ Ծանրամարտի աշխարհի առաջնությունը կանցկացվի նոյեմբերի 28-ից դեկտեմբերի 5-ը Անահայմա քաղաքում (ԱՄՆ)։
Օգոստոսին մեր մարզիկներից ոմանք կմասնակցեն միջազգային «Ունիվերսադային»։
Եվրոպայի առաջնության հաղթող Սիմոն Մարտիրոսյանը նշեց, որ հասցրել էր լավ պատրաստվել Եվրոպայի առաջնությանը։
«Լավ պատրաստվեինք մրցումներին։ Մրցակցությունը մեծ էր, բայց վերջում իմ մրցակիցները սխալվեցին»,- ասաց Մարտիրոսյանը։
Եվրոպայի առաջնությանն իր ելույթից ավելի շատ ակնկալիքներ ուներ Ռիոյի Օլիմպիադայի արծաթե մրցանակակիր Գոռ Մինասյանը։
«Ավելի շատ ակնկալիքներ ունեի, հուսամ՝ ապագայում ավելի ծանր քաշեր կբարձրացնեմ։ Կաշխատեմ կատարելագործվել»,- ասաց մարզիկը։
Իր հերթին, եվրոպական առաջնության բրոնզե մրցանակակիր Ռուբեն Ալեքսանյանը կարծիք հայտնեց, որ ի վիճակի էր հայտարարած քաշը բարձրացնել։ Մամուլի ասուլիս նա եկել էր կապած ձեռքով, բայց, իր խոսքով՝ լուրջ բան չկա, և նա պատրաստ է անցնել մարզումների։
Եվրոպայի առաջնությանը, որը կայացավ ապրիլի սկզբին խորվաթական Սպլիտ քաղաքում, Հայաստանի հավաքականը զբաղեցրեց 5-րդ տեղը։ Սիմոն Մարտիրոսյանը նվաճեց ոսկի, Գոռ Մինասյանը` արծաթե, Ռուբեն Ալեքսանյանն ու Սոնա Պողոսյանը` բրոնզե մեդալներ։
