ԵՐԵՎԱՆ, 10 ապրիլի — Sputnik. ՀՀ գլխավոր դատախազությունը տեղեկացնում է, որ առանձնացրել է տարբեր աղբյուրներից ստացած 498 հաղորդում, որոնց ուղարկել է ոստիկանության, քննչական կոմիտեի տարածքային բաժիններ, ՊՆ ռազմական ոստիկանություն և ՀՀ հատուկ քննչական ծառայություն՝ օրենքով սահմանված կարգով պատշաճ ստուգելու հանձնարարությամբ:
Բացի այդ, ստուգման առարկա է դարձել նաև ՀՀ ոստիկանությունում ստացված նույն բնույթի 309 ահազանգ:
Վարույթ իրականացնող մարմիններին հանձնարարվել է ձեռնարկել անհետաձգելի քննչական, օպերատիվ-հետախուզական միջոցառումներ՝ նշված հաղորդումների իրական հանգամանքները պարզելու, սեղմ ժամկետում իրավական գնահատական տալու նպատակով:
Ձեռնարկված օպերատիվ գործողությունների արդյունքում 16 դեպքերով արդեն հարուցվել է քրեական գործ։
11-ը՝ ՀՀ քրեական օրենսգրքի 34-153-րդ հոդվածի (մեկից ավելի անգամ կամ այլ անձի փոխարեն քվեարկելու փորձ),
3-ը՝ ՀՀ քրեական օրենսգրքի 154-րդ հոդվածի (քվեարկության գաղտնիությունը խախտելը),
2-ը՝ ՀՀ քրեական օրենսգրքի 149-րդ հոդվածի 2-րդ մասի 3-րդ և 5-րդ կետերի (լրագրողների լիազորությունների իրականացմանը խոչընդոտելը) հատկանիշներով:
Քննչական, դատավարական գործողությունները, օպերատիվ-հետախուզական միջոցառումները շարունակվում են:
