ԵՐԵՎԱՆ, 10 ապրիլի — Sputnik. Հատուկ քննչական ծառայությունը հայտնում է, որ գործի նախաքննությամբ ձեռք բերված տվյալների համաձայն, 21.03.2017թ.-ին Լիանա Ջ.-ն հարբած վիճակում մտել է ոստիկանության Գորիսի բաժին, հայհոյել, այնուհետև ձեռքերով ու ոտքերով հարվածել հերթապահ մասի դռանը, կոտրել բաժնի ոստիկաններից մեկի բջջային հեռախոսը: Լիանա Ջ.-ի խուլիգանություն կատարելու փաստի առթիվ Սյունիքի մարզային քննչական վարչությունում քրեական գործ է հարուցվել ՀՀ քրեական օրենսգրքի 258-րդ հոդվածի 1-ին մասով:
Մինչդեռ նույն օրը Լիանա Ջ.-ն, իր հերթին, ոստիկանությունում հաղորդել է, որ 21.03.2017թ.- ին գնացել է ոստիկանության Գորիսի բաժին` բերման ենթարկված ընկերոջ մասին տեղեկություններ իմանալու նպատակով, սակայն նույն բաժնի ոստիկանության աշխատակիցներն իրեն հրելով հեռացրել են բաժնից, վերցրել իր բջջային հեռախոսը և բռունցքով հարվածել դեմքին` պատճառելով մարմնական վնասվածքներ:
Դեպքի առթիվ Սյունիքի մարզային քննչական վարչությունում 309-րդ հոդվածի 2-րդ մասով հարուցվել է քրեական գործ, որը միացվել է նույն վարչությունում խուլիգանություն կատարելու փաստով հարուցված քրեական գործին և ուղարկվել Հատուկ քննչական ծառայություն:
Լիանա Ջ.-ի խուլիգանություն կատարելու և նույն քաղաքացու նկատմամբ ոստիկանության պաշտոնատար անձանց կողմից խոշտանգելու դեպքերի առթիվ Սյունիքի մարզային քննչական վարչությունում քննվող քրեական գործի նախաքննությունը շարունակվում է ՀՀ հատուկ քննչական ծառայությունում:
