ԵՐԵՎԱՆ, 10 ապրիլի- Sputnik, Արմենուհի Մխոյան. Ապրիլի 25-ից ընկերությունը Գյումրու «Շիրակ» օդանավակայանից կսկսի իրականացել կանոնավոր եւ ոչ կանոնավոր (չարտերային) չվերթեր: Ինքնաթիռն օդ կբարձրանա ապրիլի 25-ին՝ Գյումրի-Կրասնոդար-Գյումրի երթուղով: Սակայն, մինչ այդ, «Տարոն Ավիայի» առաջին օդանավը ապրիլի 10-ին վայրէջք կատարեց Գյումրու «Շիրակ» օդանավակայնում:
Գյումրեցիները քաղաքի հետ կապված ցանկացած լավ քայլ աղուհացով, դհոլ-զուռնայով ու ուրախ պարով են դիմավորում, սա էլ բացառություն չէ, չէ՞ որ ոչ միայն զբոսաշրջության զարգացմանն է նպաստում, այլ նաև աշխատատեղերի ստեղծմանը:
Ի դեպ, ընկերության ինքնաթիռը նաև Գյումրու գովազդով է զբաղվում. առաջին անգամ հայկական ավիաընկերությունների պատմության մեջ օդանավը կկրի անվանի դերասան, ճանաչված գյումրեցի Մհեր Մկրտչյանի անունը: Սա, ինչպես լրագրողներին ուրախությամբ հայտնեց ծննդով գյումրեցի, «Տարոն Ավիայի» տնօրեն Գառնիկ Պապիկյանը՝ Գյումրին գովազդելու յուրօրինակ տարբերակ է: Բացի անվանումից, ինքնաթիռի վրա մեծ տառերով գրված է «Գյումրի»:
Ընկերության սեփականատերը նաև վստահեցրեց՝ երկար տարիներ արտասահմանում` Արաբական Էմիրություններում, գործունեություն ծավալելուց հետո վերադարձել է հայրենի քաղաք՝ վստահելով ու հավատալով ՀՀ կառավարության ու, հատկապես, վարչապետ Կարեն Կարապետյանի խոստումներին:
«Ճիշտ է, իմ որոշումն էր սա, բայց վերջնական որոշումս ընդունել եմ ՀՀ վարչապետի հետ ունեցած հանդիպումից հետո: Վստահեցի ու հավատացի: Վերջիվերջո, գյումրեցի եմ, սա էլ մեր հողն է: Ես ուզում եմ իմ գործը իմ տան մեջ, իմ հողի վրա անել»,- ասաց Գառնիկ Պապիկյանը՝ կարևորելով այն բոլոր արտոնությունները, որոնք այս պահին գործում են «Շիրակ» օդանավակայանում:
Գյումրու «Շիրակ» օդանավակայանից ավիաընկերությունը թռիչքներ կիրականացնի առայժմ 3 ուղղություններով. Ռոստով, Սամարա, Կրասնոդար։ Կարճ ժամանակ անց «Տարոն Ավիայի» օդանավերով հնարավոր կլինի հասնել նաեւ Սոչի ու Մոսկվա, հետո արտերկիր, վստահեցնում է ընկերության տնօրենը:
«Տարոն Ավիայի» առաջարկված սակագները ցածր են լինելու նույն ուղղություններով Երևանի «Զվարթնոց» միջազգային օդանավակայանից առաջարկվող սակագներից։ Սահմանված է հնարավոր նվազագույն շեմը. ավիատոմսերի գները կսկսվեն 10 000 դրամից: Անկախ տոմսի գնից՝ առանց հավելավճարի ուղևորները հնարավորություն կունենան ինքնաթիռի սրահում տեղափոխել մինչեւ 7 կգ ձեռքի ուղեբեռ, ինչպես նաեւ մինչեւ 25 կգ սովորական ուղեբեռ: Տոմսերի վաճառքն արդեն սկսված է: Իրականացվում է նաեւ օնլայն վաճառք:
Ավիաընկերության օդանավն արդեն բազավորվել է «Շիրակ» օդանավակայանում: Ցանկացած հարցում օդանավակայանը, ՀՀ կառավարությունը և քաղավիացիայի վարչությունն ընկերությանն աջակցել են, մնում է հուսալ, որ թռիչքները բնակիչների համար, ինչպես խոստացել են, կլինեն մատչելի, հարմար ու անվտանգ, իսկ ընկերության համար՝ շահավետ:
