ԵՐԵՎԱՆ, 1 ապրիլի — Sputnik. Հայկական արմատներ ունեցող գեղասահորդուհի Եվգենյա Մեդվեդևան (Բաբասյան) աշխարհի կրկնակի չեմպիոն է դարձել՝ հաղթելով Հելսինկիում անցկացված գեղասահքի աշխարհի առաջնությունում։
Աշխարհի առաջնության ոսկե մեդալը նվաճած Մեդվեդևան մեկնաբանել է իր ելույթը:
«Հիանալի առաջնություն էր, ավելի լավն էր, քան նախորդ տարվանը։ Անցած տարի ես առանձնապես չէի հասկանում, թե որտեղ եմ գտնվում։ Այս տարի արդեն հասկանում էի, թե դա ինչ է։ Գիտեի՝ ինչպես պետք է վարվեմ, ինչ հույզեր կարող եմ ստանալ», — «Р-Спорт»-ը ներկայացնում է Մեդվեդևայի մեկնաբանությունը:
Գեղասահորդուհին խոստովանել է, որ կասկածելի, ծայրահեղ պահեր շատ են եղել, բայց նա կարողացել է հաղթահարել դրանք:
«Նախավարժանքի ժամանակ հուզված էի, իսկ ելույթի ժամանակ հուզմունք ընդհանրապես չկար։ Էմոցիոնալ ուժերս սպառվել էին։ Սահում և մտածում էի՝ ե՞րբ է սա վերջանալու։ Իրականում ես միշտ հաճույք եմ ստանում սահքի ժամանակ։ Նախավարժանքից առաջ, ընթացքում, հետո էլ և միշտ։ Բայց լինում են պահեր, երբ այդպիսի բան ես զգում։ Այդ ամենը կատարվում է քո սեփական գլխում և խանգարում է։ Դու պետք է կարողանաս դա կառավարել, և այսօր դա ինձ հաջողվեց»,- ասել է Մեդվեդևան։
Կարճ և կամայական ծրագրերի արդյունքում Մեդվեդևան հավաքել է 233,41 միավոր, ինչը նոր համաշխարհային ռեկորդ է։ Լավագույն եռյակում են ընդգրկվել նաև կանադացի Քեյթլին Օսմոնդն ու Գաբրիել Դեյլմանը։
Իր առաջին լուրջ հաղթանակը Մեդվեդևան գրանցել է 2011/12-ի խաղաշրջանում, երբ նա Ռուսաստանի չեմպիոն ճանաչվեց։ 2012/13-ի խաղաշրջանում նա կրկին հաղթեց այդ առաջնությունը։ 2016-ին էլ Մեդվեդևան դարձավ երրորդ ռուսաստանցի մենասահորդուհին (Իրինա Սլուցկայայի և Ելիզավետա Տուկտամիշևայից հետո), որին հաջողվեց հաղթել խաղաշրջանի բոլոր գլխավոր մրցույթները՝ Գրան-պրիի երզրափակիչ, Եվրոպայի առաջնություն, աշխարհի առաջնություն։ Նաև Մեդվեդևան աշխարհի առաջին մենասահորդուհին է, որին հաջողվել է հաղթել մեծերի առաջնությունում պատանեկան առաջնությունում հաղթելուց մեկ տարի անց։
