ԵՐԵՎԱՆ, 4 ապրիլի — Sputnik. Պետերբուրգի ահաբեկչությունը «Ալ Քաիդայի» ձեռագրին է նման, Sputnik Արմենիային ասաց արաբագետ Արմեն Պետրոսյանը։
Երկուշաբթի ժամը 14:30-ին Սանկտ Պետերբուրգի մետրոյում պայթյուններ տեղի ունեցան, նախնական տվյալներով 11 մարդ մահացել է, մի քանի տասնյակը վիրավոր են։ Տուժածների թվում կան երեխաներ։ Պետերբուրգյան մետրոյում ահաբեկչական գործողություն իրականացման մեջ մեղադրվում է Ղրղըզստանից եկած անձ։
«Չի բացառվում, որ այս գործողության հետևում կանգնած են իսլամականները։ Կարծում եմ, որ հանցագործության հետքերը տանում են դեպի Սիրիայի հակակառավարական ուժեր, մասնավորապես «Ալ Քաիդա», որի նկատմամբ Ռուսաստանը հակաահաբեկչական պայքար է տանում»,- ասաց Պետրոսյանը։
Նրա խոսքով` նման ձեռագիրը հատուկ է «Ալ Քաիդային», սիրիական նրա ճյուղավորման` նախկին «Ջեբհաթ ան Նուսրային»։
Ընդ որում, արաբագետի կարծիքով՝ չի բացառվում, որ պայթյունները կարող է իրականացրած լինել նաև Իսլամական պետությունը։ Պետրոսյանն ուշադրություն հրավիրեց այն փաստին, որ ծայրահեղ արմատական կառույցները չեն շտապում ստանձնել ահաբեկչության պատասխանատվությունը, իրավապահ մարմինները ևս իրենց գնահատականը չեն տալիս։ Ըստ նրա՝ սովորաբար, արդեն մի քանի ժամ հետո տեղի ունեցածից հետո ծայրահեղականները հայտնում են պատասխանատվության մասին, սակայն, քանի որ այս անգամ նման հայտարարություն դեռ չկա, ամեն ինչ մշուշոտ է։
Պայթյունը տեղի է ունեցել Սանկտ Պետերբուրգի «Տենխնոլոգիական ինստիտուտ» և «Սենայի հրապարակ» մետրոյի կայարանների մոտ։ Հարուցված է քրեական գործ «Ահաբեկչություն» հոդվածով, այդուամենայնիվ, հետաքննությունը դիտարկում է տեղի ունեցածի նաև այլ տարբերակներ։ Ապրիլի 4-ից Սանկտ Պետերբուրգում եռօրյա սուգ է հայտարարվել։
